Azərbaycan və Pakistan arasında dostluq və strateji tərəfdaşlıq münasibətləri uzun illərə dayanır və bu əlaqələr daim inkişaf etməkdədir. Hər iki ölkə beynəlxalq səviyyədə bir-birini dəstəkləyir və ortaq maraqlara əsaslanan əməkdaşlıq qurur. Bu çərçivədə Azərbaycan Respublikasının Prezidenti İlham Əliyevin Pakistanın Baş naziri Məhəmməd Şahbaz Şərif ilə geniş tərkibdə görüşü münasibətlərin daha da möhkəmləndirilməsi baxımından mühüm əhəmiyyət kəsb edir.
Bu görüş zamanı siyasi, iqtisadi, ticarət, energetika, nəqliyyat və digər sahələrdə əməkdaşlığın genişləndirilməsi məsələləri müzakirə olunub. Prezident İlham Əliyev çıxışında Azərbaycan və Pakistan arasında qardaşlıq münasibətlərinin tarixi köklərə dayandığını vurğulayıb və Pakistanın 44 günlük Vətən müharibəsi zamanı Azərbaycanın haqlı mövqeyini açıq şəkildə dəstəklədiyini xüsusi qeyd edib. O, eyni zamanda, Azərbaycanın da hər zaman Pakistanı dəstəklədiyini və beynəlxalq platformalarda bu mövqeyə sadiq qaldığını bildirib.
Pakistanın Baş naziri Məhəmməd Şahbaz Şərif isə Azərbaycanın dost və qardaş ölkə olduğunu, Pakistanın bu əlaqələrə xüsusi önəm verdiyini bildirib. O, Azərbaycanla iqtisadi və ticarət əlaqələrinin genişləndirilməsinin vacibliyini qeyd edib və bu sahədə yeni layihələrin həyata keçirilməsi üçün konkret addımlar atmağa hazır olduqlarını vurğulayıb.
Görüşdə iki ölkə arasında müdafiə və təhlükəsizlik sahəsində əməkdaşlıq məsələləri də müzakirə edilib. Pakistanın hərbi sənaye sahəsində əldə etdiyi təcrübənin Azərbaycanla paylaşılması və bu sahədə qarşılıqlı əməkdaşlığın dərinləşdirilməsi istiqamətində razılıq əldə olunub. Bundan əlavə, enerji və nəqliyyat sahələrində birgə layihələrin reallaşdırılması, Azərbaycanın tranzit imkanlarından Pakistanın istifadə etməsi məsələləri də diqqət mərkəzində olub. Prezident İlham Əliyev və Baş nazir Məhəmməd Şahbaz Şərif, həmçinin regional və beynəlxalq məsələlər ətrafında geniş fikir mübadiləsi aparıblar. Görüşdə iki ölkənin gələcəkdə də bir-birini beynəlxalq təşkilatlarda dəstəkləməyə davam edəcəyi vurğulanıb. Azərbaycan-Pakistan əlaqələri tarix boyu yüksək səviyyədə olub və bu gün də sürətlə inkişaf etməkdədir. Hər iki ölkə arasında strateji tərəfdaşlığın möhkəmləndirilməsi, iqtisadi və hərbi əməkdaşlığın genişləndirilməsi gələcək illərdə əlaqələrimizin daha da güclənməsinə xidmət edəcək. Bu görüş, münasibətlərin daha da dərinləşməsi üçün mühüm addım olmaqla yanaşı, yeni layihələrin və təşəbbüslərin həyata keçirilməsi baxımından da əhəmiyyətlidir.
Sahil Əliyev,
YAP-ın gənc fəalı
