Azərbaycan və Gürcüstan əsrlər boyu mehriban qonşuluq və dostluq münasibətləri çərçivəsində bir-biri ilə sıx əlaqədə olmuşdur. Tarixi, mədəni və coğrafi yaxınlıq bu münasibətlərin əsasını təşkil edir. Müasir dövrdə isə bu əlaqələr daha da dərinləşərək strateji tərəfdaşlıq səviyyəsinə yüksəlmişdir. Bu məqalədə iki ölkə arasında bütün sahələri əhatə edən əməkdaşlığın inkişaf istiqamətləri, birgə həyata keçirilən layihələrin regional və qlobal əhəmiyyəti təhlil ediləcəkdir.Azərbaycan-Gürcüstan münasibətləri yüksək səviyyəli siyasi dialoq və qarşılıqlı etimada əsaslanır. İki ölkənin rəhbərləri arasında müntəzəm görüşlər, rəsmi səfərlər və beynəlxalq tədbirlərdə bir-birini dəstəkləmələri bu münasibətlərin davamlı və dayanıqlı olduğunu göstərir. Hər iki ölkə beynəlxalq təşkilatlarda bir-birinin mövqelərini müdafiə edir, regionda sülh və sabitliyin qorunmasına töhfə verirlər.Azərbaycan və Gürcüstan arasında əməkdaşlığın əsas istiqamətlərindən biri enerji və nəqliyyat sektorudur. Xüsusilə Bakı–Tbilisi–Ceyhan (BTC) neft kəməri, Bakı–Tbilisi–Ərzurum (BTE) qaz kəməri və Cənub Qaz Dəhlizi kimi layihələr regional inteqrasiyanı gücləndirir və Avropanın enerji təhlükəsizliyinə töhfə verir. Hal-hazırda Azərbaycan 12 ölkəyə təbii qaz ixrac edir və bu ixracın əsas tranzit ölkəsi məhz Gürcüstandır.Orta Dəhliz təşəbbüsü – yəni Çin və Avropanı birləşdirən Transxəzər Beynəlxalq Nəqliyyat Marşrutu – Azərbaycan və Gürcüstan üçün böyük əhəmiyyət kəsb edir. Bakı–Tbilisi–Qars dəmir yolu, yenilənmiş liman infrastrukturları, logistika mərkəzləri bu dəhlizin inkişafını təmin edən əsas elementlərdir. İldən-ilə artan yükdaşımalar iki ölkənin logistika imkanlarını genişləndirir, eyni zamanda onların iqtisadi müstəqilliyini və regional rolunu artırır.Azərbaycan-Gürcüstan münasibətləri təkcə ikitərəfli əməkdaşlıqla məhdudlaşmır. Onlar regionda digər dövlətlər və beynəlxalq təşkilatlarla əməkdaşlıq üçün nümunəvi model təqdim edir. Enerji, nəqliyyat, təhlükəsizlik və iqtisadi sahələrdə bu münasibətlər Cənubi Qafqazda sülh, inkişaf və sabitliyin təminatçısı kimi çıxış edir.Azərbaycan və Gürcüstan arasındakı münasibətlər strateji səviyyəyə çatmaqla yanaşı, regionda əməkdaşlığın və tərəfdaşlığın uğurlu nümunəsinə çevrilmişdir. Birgə həyata keçirilən layihələr, qarşılıqlı dəstək və dostluq münasibətləri bu əməkdaşlığın daha da dərinləşəcəyindən xəbər verir. Gələcəkdə bu əlaqələrin daha geniş coğrafiyada müsbət təsir göstərəcəyi şübhəsizdir. Azərbaycan və Gürcüstan xalqları əsrlər boyu eyni coğrafiyada birgə yaşamış, ortaq mədəniyyət və ənənələr formalaşdırmışdır.
Günel Nəsibova,
Yeni Azərbaycan Partiyası,məsləhətçi
