Azərbaycan Respublikası ilə Vyetnam Sosialist Respublikası arasında diplomatik münasibətlər 23 sentyabr 1992-ci ildə qurulsa da, bu iki xalqın bir-birinə olan dostluğu və qarşılıqlı hörməti daha qədim köklərə dayanır. Soyuq müharibə dövründən etibarən, Azərbaycan və Vyetnam xalqları arasında həmrəyliyin, qarşılıqlı dəstəyin və hörmətin təməli qoyulub. Bu gün isə həmin dostluq münasibətləri strateji əməkdaşlıq ruhunda davam edir və genişlənməkdədir. Azərbaycan və Vyetnam arasında münasibətlər əsasən 20-ci əsrin ortalarından başlayır. SSRİ dövründə Vyetnam xalqının müstəqillik uğrunda apardığı mübarizəyə Azərbaycan ictimaiyyəti tərəfindən də dəstək göstərilmişdir. Həmin dövrdə azərbaycanlı alimlər, mühəndislər və mütəxəssislər Vyetnamda müxtəlif sahələrdə fəaliyyət göstərmiş, həmçinin vyetnamlı tələbələr Azərbaycanın ali təhsil müəssisələrində təhsil almışlar. Bu qarşılıqlı əlaqələr xalqlar arasında dərin mənəvi bağların formalaşmasına səbəb olub.1992-ci ildə Azərbaycan müstəqillik əldə etdikdən sonra Vyetnam Respublikası ilə diplomatik əlaqələr rəsmi şəkildə quruldu. Həmin dövrdən bu günə qədər ikitərəfli münasibətlər siyasi, iqtisadi, mədəni və humanitar sahələrdə davamlı şəkildə inkişaf edir. Azərbaycan və Vyetnam arasında müxtəlif səviyyələrdə rəsmi səfərlər, qarşılıqlı anlaşma memorandumları və əməkdaşlıq protokolları imzalanıb.İkitərəfli iqtisadi əlaqələrin inkişafı üçün böyük potensial mövcuddur. Energetika, kənd təsərrüfatı, nəqliyyat, informasiya texnologiyaları və turizm sahələri əməkdaşlıq üçün perspektivli istiqamətlərdir. Azərbaycanın neft-qaz sektoru və Vyetnamın sənaye təcrübəsi qarşılıqlı faydalı əməkdaşlıq imkanları yaradır. Azərbaycan və Vyetnam arasında mədəni mübadilə, elm və təhsil sahəsində əməkdaşlıq da vacib yer tutur. Müxtəlif illərdə keçirilən mədəniyyət günləri, sərgilər, elmi seminarlar və tələbə mübadilə proqramları iki xalq arasında qarşılıqlı anlaşma və dostluğu gücləndirir. Azərbaycan və Vyetnam dostluğu bugünkü dəyişkən beynəlxalq münasibətlər sistemində qarşılıqlı dəstək, suverenliyə hörmət və əməkdaşlıq prinsipinə əsaslanır. İkitərəfli əlaqələrin gələcək illərdə daha da dərinləşəcəyi, yeni sahələri əhatə edəcəyi və hər iki xalqın rifahına xidmət edəcəyi şübhəsizdir.
Günel Nəsibova,
Yeni Azəebaycan Partiyası,məsləhətçi
