Cənubi Qafqazda formalaşan yeni geosiyasi reallıqlar fonunda Azərbaycan Respublikasının Prezidenti İlham Əliyevin Gürcüstana həyata keçirdiyi səfər xüsusi strateji məna daşıyır. Bu səfər təkcə diplomatik protokol xarakteri daşımır, eyni zamanda regionda güc balansının və əməkdaşlıq modelinin yenidən müəyyənləşdirilməsinə xidmət edir.
Azərbaycan və Gürcüstan arasında münasibətlər uzun illərdir ki, qarşılıqlı etimad və ortaq maraqlar üzərində qurulub. Bu gün isə bu əlaqələr daha da dərinləşərək regionun enerji təhlükəsizliyində və nəqliyyat xəritəsində həlledici rol oynayır. Xüsusilə Bakı-Tbilisi-Ceyhan və Cənub Qaz Dəhlizi kimi qlobal əhəmiyyətli layihələr iki ölkənin strateji tərəfdaşlığını beynəlxalq səviyyədə möhkəmləndirib.
Prezident İlham Əliyevin Gürcüstana səfəri çərçivəsində aparılan müzakirələr göstərir ki, Azərbaycan artıq regionda yalnız iştirakçı deyil, təşəbbüskar və istiqamətverici dövlətdir. Bu isə ölkəmizin artan siyasi nüfuzunun və müstəqil siyasət yürütmə qabiliyyətinin bariz göstəricisidir.
Eyni zamanda bu səfər regionda sabitliyin qorunması, iqtisadi inteqrasiyanın genişlənməsi və yeni əməkdaşlıq platformalarının yaradılması baxımından mühüm əhəmiyyət kəsb edir. Gürcüstanla möhkəm tərəfdaşlıq Azərbaycan üçün Qərbə açılan qapı rolunu oynamaqla yanaşı, regionda uzunmüddətli sülhün təminatına da töhfə verir.
Nəticə olaraq qeyd etmək lazımdır ki, Prezident İlham Əliyevin həyata keçirdiyi məqsədyönlü və uzaqgörən siyasət nəticəsində Azərbaycan bu gün regionun aparıcı siyasi və iqtisadi güc mərkəzlərindən birinə çevrilib. Gürcüstana bu səfər isə həmin strategiyanın uğurlu davamı kimi tarixə düşür.
Səbinə Həsənova,
YAP-ın fəalı
