Akademik Zərifə Əliyeva Azərbaycan tibb elminin inkişafında müstəsna xidmətləri olan, həm elmi fəaliyyəti, həm də yüksək mənəvi keyfiyyətləri ilə xalqın dərin hörmətini qazanmış görkəmli şəxsiyyətlərdən biridir. Onun 15 aprel anım günü Azərbaycan ictimaiyyəti üçün xüsusi əhəmiyyət kəsb edir. Bu tarix yalnız bir alimin xatirəsinin yad edilməsi deyil, eyni zamanda elmə, insanlığa və vətənə xidmətin ən yüksək nümunəsinin təbliği kimi dəyərləndirilir. Zərifə xanım Əliyeva 1923-cü il aprelin 28-də Naxçıvanda anadan olmuşdur. O, görkəmli dövlət xadimi Əziz Əliyevin qızı idi. Belə bir ailədə böyüməsi onun gələcək həyat yolunun formalaşmasına mühüm təsir göstərmişdir. Uşaqlıq illərindən elmə və təhsilə böyük maraq göstərən Zərifə xanım orta məktəbi müvəffəqiyyətlə bitirdikdən sonra Azərbaycan Dövlət Tibb İnstitutuna daxil olmuş və burada yüksək nəticələr əldə etmişdir. Onun tələbəlik illərindən seçilən əsas xüsusiyyətlərindən biri də zəhmətkeşliyi, məsuliyyət hissi və elmə sonsuz bağlılığı idi. Ali təhsilini başa vurduqdan sonra Zərifə Əliyeva oftalmologiya sahəsində fəaliyyət göstərməyə başlamışdır. Bu sahə o dövrdə kifayət qədər inkişaf etməmişdi və ciddi elmi araşdırmalara ehtiyac duyulurdu. O, məhz bu çətin, lakin vacib sahəni seçərək Azərbaycan tibb elminə böyük töhfələr vermişdir.
Zərifə xanımın elmi tədqiqatlarının əsas istiqamətlərindən biri peşə fəaliyyəti ilə əlaqədar yaranan göz xəstəliklərinin öyrənilməsi olmuşdur. Kimya sənayesində çalışan insanların görmə orqanlarında baş verən dəyişiklikləri araşdıraraq bu sahədə mühüm nəticələr əldə etmişdir. Onun elmi fəaliyyəti nəticəsində bir sıra mühüm metodlar işlənib hazırlanmış, diaqnostika və müalicə sahəsində yeni yanaşmalar tətbiq edilmişdir.
Zərifə Əliyeva oftalmologiya sahəsində yazdığı monoqrafiyalar və elmi məqalələrlə təkcə Azərbaycanda deyil, beynəlxalq səviyyədə də tanınmışdır. O, tibb elmləri doktoru elmi dərəcəsini almış, akademik adına layiq görülmüşdür. Bu isə onun elmi fəaliyyətinin yüksək qiymətləndirilməsinin bariz nümunəsidir. Zərifə Əliyevanın fəaliyyəti yalnız elmlə məhdudlaşmırdı. O, həm də qayğıkeş həkim kimi minlərlə insanın sağlamlığının qorunmasına xidmət etmişdir. Pasiyentlərinə qarşı diqqətli və həssas yanaşması onu insanların qəlbində xüsusi yerə sahib etmişdir. O, hər zaman həkim peşəsinin əsas prinsiplərindən biri olan humanizmə sadiq qalmış, insanlara yardım etməyi həyatının əsas məqsədi hesab etmişdir. Onun həyatında ailə dəyərləri də mühüm yer tutmuşdur. Zərifə xanım Azərbaycan xalqının ümummilli lideri Heydər Əliyevin həyat yoldaşı olmuş, ona hər zaman dəstək göstərmişdir. Ailəsində yaratdığı sevgi, hörmət və qarşılıqlı anlayış mühiti onun şəxsiyyətinin bütövlüyünü bir daha nümayiş etdirirdi. O, həm də qayğıkeş ana kimi övladlarının tərbiyəsinə xüsusi diqqət yetirmişdir. 15 aprel – Akademik Zərifə Əliyevanın anım günü ölkəmizdə geniş qeyd olunur. Bu gün müxtəlif elmi konfranslar, tədbirlər keçirilir, onun xatirəsi böyük ehtiramla yad edilir. Tibb işçiləri və gənc alimlər onun həyat və fəaliyyətindən ilham alır, onun elmi irsini davam etdirməyə çalışırlar. Bu cür tədbirlər gənc nəslin elmə marağının artırılmasında, onların vətənə və xalqa xidmət ruhunda yetişməsində mühüm rol oynayır.
Zərifə Əliyevanın həyat yolu hər bir insan üçün nümunədir. Onun zəhmətkeşliyi, məqsədyönlülüyü, insanlara olan sevgisi və vətənə bağlılığı bu gün də aktuallığını qoruyur. O, sübut etmişdir ki, əsl alim olmaq üçün yalnız bilik deyil, həm də yüksək mənəvi keyfiyyətlər vacibdir. Bu gün Zərifə Əliyevanın xatirəsi Azərbaycan xalqının qəlbində yaşayır. Onun elmi irsi, tibb sahəsində qazandığı nailiyyətlər və insanlara göstərdiyi xidmətlər heç zaman unudulmayacaqdır. 15 aprel anım günü isə bu böyük şəxsiyyətin həyat və fəaliyyətini bir daha xatırlamaq, onun ideyalarını yaşatmaq və gələcək nəsillərə ötürmək üçün mühüm bir fürsətdir. Belə görkəmli şəxsiyyətlərin həyat yolu zaman keçdikcə daha da dəyər qazanır. Akademik Zərifə Əliyeva da məhz bu cür əbədiyaşar insanlardan biridir. Onun adı Azərbaycan tibb tarixində qızıl hərflərlə yazılmışdır və gələcək nəsillər üçün daim bir örnək olaraq qalacaqdır.
Günel Əbdürəhmanova,
Yeni Azərbaycan Partiyası, məsləhətçi
