26 Avqust – Laçın Şəhəri Günü: Zəfərdən Böyük Qayıdışa uzanan yol
Laçın – Azərbaycanın zəngin tarixini, misilsiz təbiətini və milli-mənəvi dəyərlərini özündə yaşadan qədim yurd yerlərimizdən biridir. Bu şəhərin adı xalqımızın yaddaşında həm illərlə davam edən həsrətin, həm də böyük Zəfərin rəmzi kimi yaşayır.
Azərbaycan xalqının ən böyük arzularından biri işğal altında olan torpaqlarımızın azad edilməsi və məcburi köçkünlərin doğma yurdlarına qayıtması idi. 2020-ci ildə 44 günlük Vətən müharibəsində qazanılan tarixi Qələbə bu arzunun reallığa çevrilməsinin əsasını qoydu. Laçın rayonu həmin ilin dekabrında Azərbaycana qaytarıldı.
26 avqust 2022-ci il isə Laçın şəhərinin tarixində xüsusi əhəmiyyət daşıyan gün oldu. Həmin gün Azərbaycan Ordusu Laçın şəhərinə daxil olaraq şəhərə nəzarəti təmin etdi. Bu tarixi hadisə uzun illər doğma torpaqlarından ayrı düşmüş laçınlıların qayıdışına gedən yolun başlanğıcı oldu.
Azərbaycan Respublikasının Prezidenti İlham Əliyevin Sərəncamı ilə 26 avqustun Laçın Şəhəri Günü elan edilməsi bu tarixi hadisənin əhəmiyyətini bir daha təsdiqləyir. Laçın Şəhəri Günü xalqımızın Zəfər tarixinin, şəhidlərimizin qəhrəmanlığının və dövlətimizin qətiyyətli siyasətinin təcəssümüdür.
Bu gün Laçında genişmiqyaslı quruculuq və bərpa işləri həyata keçirilir. Şəhər müasir tələblərə uyğun yenidən qurulur, sosial və infrastruktur layihələri icra olunur. Ən böyük sevinc isə illərlə doğma yurd həsrəti ilə yaşayan laçınlıların öz evlərinə qayıtmasıdır. Bu qayıdış Böyük Qayıdışın ən mühüm və qürurverici səhifələrindən biridir.
Laçının yenidən dirçəldilməsi yalnız bir şəhərin bərpası deyil. Bu, tariximizin, milli irsimizin və doğma torpaqlara bağlılığımızın yenidən canlandırılmasıdır. Bu gün Laçının küçələrində həyatın yenidən canlanması, üçrəngli Azərbaycan Bayrağının dalğalanması xalqımızın böyük Zəfərinin ən gözəl ifadəsidir.
26 Avqust – Laçın Şəhəri Günü hər bir azərbaycanlı üçün qürur və sevinc günüdür. Bu əlamətdar tarix bizə bir daha göstərir ki, doğma torpağa sevgi, milli birlik və güclü dövlət iradəsi ən böyük arzuları belə gerçəyə çevirir.
Laçın bu gün azaddır, yenidən qurulur və yaşayır. Onun gələcəyi Azərbaycanın gələcəyi kimi parlaq və əbədidir.
Mustafa Məmmədzadə,
Xəzər rayonunun gənc fəalı,
Azərbaycan Universitetinin tələbəsi
