Zəngilanın azad olunması Azərbaycan tarixində uzun illər davam edən torpaq həsrətinin sona çatmasına doğru atılmış mühüm addım oldu. Rayon 1993-cü il oktyabrın 29-da işğal edilmiş, minlərlə insan doğma evindən və yurdundan didərgin düşmüşdü. İllər ərzində zəngilanlılar öz torpaqlarına qayıtmaq ümidi ilə yaşadılar.
Prezident İlham Əliyevin rəhbərliyi ilə Azərbaycan dövləti ərazi bütövlüyünün bərpasını əsas milli məqsədlərdən biri kimi müəyyənləşdirdi. Ölkənin iqtisadi imkanlarının artırılması, ordunun müasirləşdirilməsi və müdafiə qabiliyyətinin gücləndirilməsi istiqamətində ardıcıl tədbirlər görüldü. Bu siyasət Vətən müharibəsində qazanılan uğurların əsasını təşkil etdi.
2020-ci il oktyabrın 20-də Zəngilan şəhərinin azad edilməsi tarixi ədalətin bərpasında əlamətdar hadisəyə çevrildi. Müzəffər Ali Baş Komandan Prezident İlham Əliyevin rəhbərliyi ilə Azərbaycan Ordusu işğal altındakı torpaqların azadlığı uğrunda qəhrəmanlıq göstərdi. Zəngilanın azad edilməsi xalqın dövlətə və orduya inamını daha da möhkəmləndirdi.
Azadlıqdan sonra qarşıda duran əsas vəzifələrdən biri dağıdılmış yaşayış məntəqələrinin bərpası və insanların doğma torpaqlarına qayıdışının təmin edilməsi oldu. Zəngilanda yollar çəkilir, yaşayış sahələri salınır, elektrik və su təchizatı sistemləri yenilənir. Sosial infrastrukturun yaradılması rayonun iqtisadi və ictimai həyatının canlanmasına şərait yaradır.
Bu gün Zəngilan tarixi ədalətin bərpasının və gələcəyə yönəlmiş dövlət siyasətinin nümunəsidir. Prezident İlham Əliyevin rəhbərliyi ilə azad edilmiş ərazilərdə həyata keçirilən layihələr qələbənin nəticələrinin möhkəmləndirilməsinə xidmət edir. Zəngilanın yenidən qurulması milli yaddaşın qorunması ilə yanaşı, gələcək nəsillər üçün inkişaf edən bir yurdun yaradılması deməkdir.
Nəzakət Bağırova,
YAP Nizami rayon təşkilatının “Əli Vəliyev küçəsi, 4” ərazi partiya təşkilatının sədr müavini
