Zəfər Lüğətinin Qubadlı Səhifəsi: Şanlı Qayıdış və Gələcəyə Baxış
Qubadlı rayonunun azad edilməsi 44 günlük Vətən müharibəsinin strateji və mənəvi baxımdan en mühüm mərhələlərindən biri kimi tariximizə həkk olundu. Əlverişli coğrafi mövqeyə və mürəkkəb relyefə malik olan bu ərazinin azad olunması əməliyyatı hərbçilərimizin yüksək peşəkarlığını, cəsarətini və sarsılmaz iradəsini bütün dünyaya sübut etdi. Düşmənin möhkəmləndiyi istehkamların darmadağın edilməsi ilə Qubadlı şəhəri və ətraf kəndləri cəmi bir neçə gün ərzində işğalçıların tapdağından xilas edildi və bölgədə Böyük Zəfərin təməlləri daha da möhkəmləndirildi.
27 illik işğal dövründə Qubadlının zəngin təbii ehtiyatları, meşələri, tarixi-memarlıq abidələri və yaşayış məntəqələri ağır vandalizmə məruz qalaraq dağıdılmışdı. Rayonun infrastrukturu tamamilə sıradan çıxarılsa da, qələbədən dərhal sonra başlayan sürətli yenidənqurma prosesi bu qədim diyarın yaralarını sarımağa başladı. Keçmişin dağıntıları üzərində yüksələn yeni tikililər, xüsusilə müasir nəqliyyat və energetika şəbəkələrinin qurulması bölgənin simasını köklü şəkildə dəyişir.
Bu gün Qubadlıda həyata keçirilən layihələr təkcə fiziki bərpa ilə məhdudlaşmır, həm də bölgəyə yeni sosial-iqtisadi nəfəs gətirir. Müasir “ağıllı” kənd konseptlərinə uyğun inşa edilən yaşayış massivləri, yeni məktəblər, tibb müəssisələri və kənd təsərrüfatı kompleksləri keçmiş məcburi köçkünlərin doğma ocaqlarına rahat və təhlükəsiz qayıdışını təmin edir. Zəngin torpağı və gözəl təbiəti ilə tanınan rayon tezliklə Şərqi Zəngəzurun ən mühüm kənd təsərrüfatı və turizm mərkəzlərindən birinə çevrilmək yolundadır.
Yüzlərlə şəhidimizin qanı hesabına azad edilən Qubadlı zəfəri xalqımızın milli həmrəyliyinin və mənəvi gücünün rəmzidir. Hər il 25 oktyabr Qubadlı Şəhəri Günü kimi böyük qürurla qeyd olunur, torpaqlarımızı bizə bəxş edən qəhrəmanlarımızın xatirəsi dərin ehtiramla yad edilir. Qubadlının dirçəlişi Azərbaycanın sarsılmaz qüdrətinin və öz tarixi torpaqlarına əbədi sahibliyinin parlaq təcəssümüdür.
Nihal Muradzadə,
YAP Nizami rayon təşkilatının fəalı
