Müstəqil dövlətin davamlı inkişafı üçün suverenliyin qorunması və milli maraqların beynəlxalq münasibətlər sistemində ardıcıl müdafiəsi əsas şərtlərdəndir. Azərbaycan müstəqilliyini bərpa etdikdən sonra bu istiqamətdə mürəkkəb siyasi və təhlükəsizlik çağırışları ilə üzləşib. Prezident İlham Əliyevin rəhbərliyi ilə həyata keçirilən çoxşaxəli siyasət ölkənin siyasi, iqtisadi və hərbi potensialının gücləndirilməsinə, dövlət suverenliyinin möhkəmləndirilməsinə yönəlib.
Dövlət suverenliyinin təmin olunması ilk növbədə güclü iqtisadi və institusional baza tələb edir. Azərbaycanın enerji strategiyası, beynəlxalq iqtisadi əlaqələrinin genişləndirilməsi, nəqliyyat-kommunikasiya imkanlarının inkişafı və regional əməkdaşlıq təşəbbüsləri ölkənin müstəqil siyasət yürütmək imkanlarını artırıb. İqtisadi potensialın güclənməsi dövlətin təhlükəsizlik və müdafiə sahələrində də daha geniş imkanlara malik olmasına şərait yaradıb.
Prezident İlham Əliyevin rəhbərliyi ilə Azərbaycan Ordusunun modernləşdirilməsi və müdafiə qabiliyyətinin artırılması xüsusi prioritet təşkil edib. Müasir silah sistemlərinin əldə edilməsi, hərbi təlimlərin keçirilməsi, peşəkar kadr hazırlığı və müdafiə sənayesinin inkişafı ordunun döyüş qabiliyyətini əhəmiyyətli dərəcədə gücləndirib. 2020-ci ildə Vətən müharibəsində əldə edilən qələbə bu uzunmüddətli hazırlığın və siyasi iradənin nəticələrini nümayiş etdirdi.
2023-cü ildə Azərbaycanın bütün ərazisində suverenliyinin bərpası dövlətçilik tarixində yeni mərhələ yaratdı. Bu hadisə ölkənin konstitusion hüquq qaydasının ərazi baxımından tam təmin olunması, dövlət institutlarının vahid hüquqi məkan çərçivəsində fəaliyyət göstərməsi və milli təhlükəsizliyin möhkəmlənməsi baxımından əhəmiyyətlidir. Azad edilmiş ərazilərdə həyata keçirilən bərpa və quruculuq işləri də suverenliyin sosial-iqtisadi məzmununu gücləndirir.
Müasir Azərbaycanın dövlətçilik strategiyası suverenliyin yalnız hərbi və siyasi deyil, həm də iqtisadi, hüquqi və texnoloji istiqamətlərdə möhkəmləndirilməsini nəzərdə tutur. Prezident İlham Əliyevin rəhbərliyi ilə həyata keçirilən siyasət bu istiqamətlərin qarşılıqlı əlaqədə inkişafına əsaslanır. Konstitusiya isə bütün bu proseslərin hüquqi çərçivəsini müəyyən edən əsas sənəd kimi dövlət müstəqilliyinin təminatında mühüm rol oynayır.
Arif Qurbanov,
YAP Nizami rayon təşkilatının “Məmmədəli Şərifli küçəsi, 161” ərazi partiya təşkilatının sədri
