12 Noyabr Azərbaycan Respublikasının dövlətçilik tarixində mühüm və əlamətdar günlərdən biridir. Bu tarix ölkəmizin hüquqi, siyasi və demokratik inkişaf yolunda atdığı ən mühüm addımlardan biri – Azərbaycan Respublikasının Konstitusiyasının qəbul olunduğu gündür. Hər il 12 noyabr tarixi Azərbaycan Respublikasının Konstitusiya Günü kimi qeyd olunur.
1995-ci il noyabrın 12-də ümumxalq səsverməsi — referendum yolu ilə Azərbaycan Respublikasının ilk milli Konstitusiyası qəbul olundu. Bu hadisə müstəqil Azərbaycanın hüquqi dövlət quruculuğunda dönüş nöqtəsi oldu. Məhz həmin gün ölkəmiz özünün ali qanununa – dövlətin siyasi, iqtisadi və ictimai əsaslarını müəyyən edən sənədə sahib oldu.
Konstitusiyanın hazırlanması və qəbul edilməsi Ulu Öndər Heydər Əliyevin rəhbərliyi ilə həyata keçirilmişdir. Onun rəhbərlik etdiyi Konstitusiya Komissiyası 1995-ci ilin əvvəlindən layihə üzərində ciddi şəkildə çalışmış, sənədin məzmunu xalqın iradəsini, azərbaycançılıq ideologiyasını, demokratik və humanist dəyərləri əks etdirmişdir.
Azərbaycan Respublikasının Konstitusiyası ölkəmizin dövlət quruluşunun əsasını təşkil edir. O, xalqın suverenliyini, hakimiyyətin mənbəyinin məhz xalq olduğunu təsbit edir. Konstitusiya insan hüquq və azadlıqlarının təminatına, qanun qarşısında bərabərliyə, sosial ədalətə və demokratik dəyərlərə əsaslanır.
Əsas Qanunda dövlətin ali məqsədi kimi insan və vətəndaşın hüquq və azadlıqlarının qorunması göstərilir. Bundan əlavə, Konstitusiya Azərbaycan Respublikasının müstəqilliyini, ərazi bütövlüyünü və dünyəvi dövlət quruluşunu təmin edən hüquqi baza rolunu oynayır.
Qəbul olunduğu vaxtdan etibarən Konstitusiya dövrün tələblərinə uyğun olaraq bir neçə dəfə dəyişikliklərə məruz qalıb. 2002, 2009, 2016-cı illərdə keçirilən referendumlar vasitəsilə sənədə mühüm əlavə və düzəlişlər edilmişdir. Bu dəyişikliklər ölkədə idarəetmə sisteminin müasirləşdirilməsinə, insan hüquqlarının daha etibarlı qorunmasına və demokratik prinsiplərin dərinləşdirilməsinə xidmət etmişdir.
12 Noyabr – Azərbaycan xalqı üçün sadəcə bir tarix deyil, dövlət müstəqilliyinin, azadlığın və milli suverenliyin hüquqi təminatını rəmz edən bayramdır. Bu gün dövlət idarəetməsində qanunun aliliyinin, hüquq mədəniyyətinin və vətəndaş məsuliyyətinin təbliği baxımından xüsusi əhəmiyyət daşıyır.
Konstitusiya Günü hər il ölkə boyu rəsmi tədbirlərlə, elmi konfranslarla, təhsil müəssisələrində maarifləndirici görüşlərlə qeyd olunur. Bu tədbirlər cəmiyyətin hüquqi savadlılığının artırılmasına, gənc nəslin dövlətçilik dəyərlərinə sadiq ruhda tərbiyə olunmasına xidmət edir.
Azərbaycan Respublikasının Konstitusiyası xalqın iradəsinin ifadəsidir. O, dövlət müstəqilliyimizin hüquqi dayağı, demokratik cəmiyyətimizin əsas sütunudur. 12 Noyabr tarixi bizə azad, suveren və hüquqi dövlətin vətəndaşları olduğumuzu xatırladır. Azərbaycan Respublikasının Konstitusiyası Günü – milli dövlətçiliyimizin, hüquqi və demokratik dəyərlərimizin təntənəsidir.
Əlizadə Günel,
Yeni Azərbaycan partiyası,məsləhətçi
