“Azərbaycan qadınları tarix boyu ölkənin ictimai-siyasi və mədəni həyatında mühüm rol oynamış, dövlət quruculuğunda, elmdə, mədəniyyətdə və ordu sahəsində əhəmiyyətli iz qoymuşlar. Onlar həm döyüş meydanında, həm də idarəçilikdə mühüm mövqeyə sahib olmuş, cəmiyyətin inkişafına böyük töhfələr vermişlər. Azərbaycan qadınları əsrlər boyu milli-mənəvi dəyərlərin qoruyucusu olmuş, ana dilimizin, mədəniyyətimizin və mənəviyyatımızın ən etibarlı dayağı sayılmışdır. Onların elm, mədəniyyət və incəsənət sahəsindəki uğurları qadınların cəmiyyətə təsir gücünü daha da artırmışdır”.
Bunu “Obyektivxeber.az”a açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, Ulu Öndər Heydər Əliyev ölkədə qadın siyasətinin əsasını qoymuş, onların dövlət idarəçiliyində fəal iştirakına geniş imkanlar yaratmışdır. Onun təşəbbüsləri nəticəsində Azərbaycan qadınları müxtəlif sahələrdə yüksək mövqelərə sahib olmuşlar. Dövlət müstəqilliyinin bərpasından sonra Azərbaycan qadınları dövlət quruculuğu prosesində fəal iştirak edərək ölkənin sosial-iqtisadi inkişafına mühüm töhfələr vermişlər. Onlar təkcə cəmiyyətin inkişafında deyil, həm də hərbi sahədə fəal iştirak etmiş, Azərbaycan Ordusunda xidmət edərək Vətən qarşısında mühüm vəzifələr yerinə yetirmişlər.
“Azərbaycan Respublikasının Birinci vitse-prezidenti Mehriban Əliyeva həm ölkədə, həm də beynəlxalq arenada qadınların nüfuzunu artıran mühüm fəaliyyətlər həyata keçirmişdir. O, Heydər Əliyev Fondu vasitəsilə bir çox sosial və humanitar layihələrə rəhbərlik edərək Azərbaycan qadınının gücünü və mərhəmətini dünyaya nümayiş etdirmişdir. Qadınlar təkcə sosial və mədəni sahələrdə deyil, həm də siyasi fəaliyyətlərdə mühüm rol oynayırlar. Milli Məclisdə qadın deputatların sayının artması onların ölkənin siyasi həyatında daha fəal iştirak etdiyini göstərir. 2020-ci ildə Milli Məclisin sədri Sahibə Qafarovanın seçilməsi qadınların siyasi rəhbərlikdə də mühüm yer tutduğunu sübut edir”.
Onun sözlərinə görə, Azərbaycan qadınları tarixin bütün dövrlərində cəmiyyətin aparıcı qüvvəsi olmuş və bu gün də inkişafda mühüm rol oynamaqdadırlar. Prezident İlham Əliyevin rəhbərliyi altında dövlət qadın siyasəti daha da gücləndirilmiş, qadınların hüquqları geniş şəkildə təmin olunmuşdur. Azərbaycan qadını öz mərhəməti, intellekti və iradəsi ilə ölkənin tərəqqisində mühüm yer tutaraq ictimai-siyasi həyatın bütün sahələrində özünü doğrultmaqdadır.
