2025-ci il oktyabrın 18-də Azərbaycan Respublikasının Prezidenti İlham Əliyevin Qazaxıstanın rəsmi “Kazinform” informasiya agentliyinə verdiyi müsahibə iki ölkə arasında mövcud olan sıx əlaqələrin və qarşılıqlı əməkdaşlığın əhatəli mənzərəsini təqdim etdi.
Müsahibə, təkcə siyasi münasibətlərin yüksək səviyyəsini deyil, həmçinin iqtisadi, nəqliyyat-logistika, mədəni-humanitar və regional əməkdaşlığın gələcək inkişaf perspektivlərini də nümayiş etdirdi.
Prezident İlham Əliyev iki ölkə arasında siyasi əlaqələrin güclü qarşılıqlı etimada, ortaq türk köklərinə və tarixi qardaşlığa əsaslandığını xüsusi vurğuladı. Onun sözlərinə görə, Azərbaycan və Qazaxıstan arasında münasibətlər bu gün olduqca yüksək səviyyədədir və son illərdə intensivləşən qarşılıqlı səfərlər, o cümlədən onun Qazaxıstana həyata keçirdiyi yeddinci səfər bunu bir daha təsdiqləyir.
Azərbaycan Prezidenti qeyd etdi ki, bu münasibətlər sadəcə dostluq çərçivəsində deyil, strateji tərəfdaşlıq səviyyəsindədir və hər iki ölkənin liderləri arasında formalaşmış etimad mühiti regional sabitliyə də müsbət təsir göstərir.
İqtisadi əlaqələrə toxunan dövlət başçısı bildirdi ki, son illərdə ticarət dövriyyəsində əhəmiyyətli artım qeydə alınıb. 2024-cü ildə bu rəqəm 470 milyon ABŞ dolları təşkil etmişdisə, 2025-ci ilin yanvar-avqust ayları ərzində 547 milyon dollara çatıb. Bu isə əvvəlki ilin müvafiq dövrü ilə müqayisədə üç dəfədən artıq artım deməkdir.
Prezident bu dinamikanın əsas səbəbləri sırasında nəqliyyat-logistika sahəsində birgə həyata keçirilən layihələri və “Orta Dəhliz”in (Middle Corridor) potensialından səmərəli istifadəni göstərdi. Onun fikrincə, Azərbaycan və Qazaxıstan bu sahədə bir-birini tamamlayan ölkələrdir və onların iştirakı ilə regionun tranzit imkanları əhəmiyyətli dərəcədə genişlənməkdədir.
İlham Əliyev qarşılıqlı sərmayələrin də yüksələn xətlə inkişaf etdiyini qeyd etdi. Azərbaycanın Qazaxıstan iqtisadiyyatına yatırdığı sərmayələrin həcmi 225 milyon ABŞ dolları təşkil edir. Qazaxıstan isə Azərbaycana 136 milyon dollar həcmində investisiya qoyub.
Bundan əlavə, Azərbaycanda Qazaxıstan kapitalı ilə fəaliyyət göstərən təxminən 250 kommersiya subyektinin mövcudluğu iqtisadi münasibətlərin dayanıqlı şəkildə inkişaf etdiyini sübut edir.
Müsahibədə mədəni-humanitar əlaqələr də önəmli yer tutdu. Prezident vurğuladı ki, Azərbaycan və Qazaxıstan xalqları arasında ortaq tarix, mədəniyyət və dini dəyərlər bu sahədə əməkdaşlığın təbii əsaslarını təşkil edir.
Ötən illərdə hər iki ölkədə təşkil olunan mədəniyyət günləri xalqlar arasında qarşılıqlı anlaşma və dostluq münasibətlərini daha da möhkəmləndirib. Bu əməkdaşlıq, həmçinin təhsil, elmi araşdırmalar və humanitar təşəbbüslər sahəsində də davam edir.
Prezident İlham Əliyev regional məsələlərə də xüsusi diqqət ayırdı. O, Xəzər dənizinin səviyyəsinin azalmasını ciddi ekoloji və iqtisadi problem kimi qiymətləndirərək, sahilyanı dövlətlər arasında daha sıx əməkdaşlıq və elmi məlumat mübadiləsinin vacibliyini vurğuladı.
Onun fikrincə, bu məsələ yalnız bir ölkənin deyil, bütün regionun ortaq problemdir və birgə səylər tələb edir.
Gələcəyə dair fikirlərini bölüşən Prezident İlham Əliyev Azərbaycan və Qazaxıstan arasında bütün sahələrdə əməkdaşlığın genişlənəcəyinə əminliyini ifadə etdi.
Onun sözlərinə görə, ortaq hədəflərə yönəlmiş bu əməkdaşlıq təkcə iki ölkə üçün deyil, ümumilikdə region üçün sabitlik, iqtisadi inkişaf və təhlükəsizlik baxımından böyük əhəmiyyət daşıyır.
Bu müsahibə Azərbaycanın Qazaxıstanla münasibətlərə verdiyi strateji önəmi bir daha nümayiş etdirdi. Tərəflər arasında tarixi bağlara əsaslanan bu tərəfdaşlıq hazırda konkret layihələr və praktiki nəticələr üzərində qurulur.
Bu da göstərir ki, Azərbaycan və Qazaxıstan arasında əməkdaşlıq sadəcə ötəri diplomatik münasibətlərdən ibarət deyil, regional və qlobal proseslərdə ortaq mövqelərlə müşayiət olunan dərin və davamlı tərəfdaşlıq modelidir.
Məmmədova Nərmin,
Yeni Azərbaycan Partiyası, məsləhətçi
