İqtisadiyyat Nazirliyi “Biznes Park Abşeron” özəl sənaye məhəlləsini dövlət qeydiyyatına alıb.
Obyektivxeber.az “Qafqazinfo” -a istinadən xəbər verir ki, Abşeron Logistika Mərkəzinin layihəsi olan “Biznes Park Abşeron” özəl sənaye məhəlləsinin yaradılma məqsədi ölkədə sənaye ekosistemini gücləndirmək, innovativ texnologiyaların tətbiqini təşviq etmək və sahibkarlara yüksək səmərəliliklə fəaliyyət göstərə biləcəkləri funksional biznes mühiti təqdim etməkdir.
Bakı şəhəri, Lökbatan qəsəbəsində yerləşən biznes park istehsal, emal və anbar əməliyyatlarının maksimum səmərəli və sürətlə həyata keçirilməsinə imkan verir.
“Biznes Park Abşeron” özəl sənaye məhəlləsində fəaliyyət göstərəcək sahibkarlar aşağıdakı imtiyazlardan faydalana bilərlər:
İstehsal texnologiyasını qısa zamanda hazır infrastrukturda yerləşdirmək; gömrük rejimlərindən effektiv şəkildə istifadə etmək; özəl sənaye məhəlləsində rezidentlik şəhadətnaməsi əldə etməklə, investisiya təşviqi sənədi üzrə aşağıdakı güzəştlərdən yararlanmaq:
– mənfəət vergisinin 50%-i həcmində güzəşt,
– istehsal üçün gətiriləcək avadanlıqlara görə idxal gömrük rüsumu və ƏDV-dən 100% azadolma;
Abşeron Logistika Mərkəzinin logistik xidmətlərindən faydalanmaq.
