Azərbaycan xalqı üçün tarixi və mənəvi baxımdan əhəmiyyətli olan günlərdən biri də Xankəndi, Xocalı, Xocavənd və Ağdərə şəhərləri günüdür. Bu gün Azərbaycanın ərazi bütövlüyünün tam bərpasının, milli qürurun və dövlət suverenliyinin təntənəsinin rəmzidir. Artıq ikinci ildir ki, bu gün ölkəmizdə xüsusi ehtiramla qeyd olunur və xalqın yaddaşında möhkəm yer tutur.
2023-cü il oktyabrın 15-də Azərbaycan Prezidenti, Silahlı Qüvvələrin Ali Baş Komandanı İlham Əliyev Xankəndi, Xocalı, Xocavənd və Ağdərə şəhərlərində Dövlət Bayrağını ucaltdı. Bu hadisə xalqımız üçün böyük tarixi dönüş nöqtəsi oldu. Uzun illər işğal altında qalan, faciələrin, soyqırımların və məcburi köçkünlük acısının simvoluna çevrilən bu torpaqlarda Dövlət Bayrağının dalğalanması həm şəhidlərin ruhuna hörmət, həm də ədalətin bərpası idi.
Bu günün ildönümünün qeyd olunması, əslində, yalnız bir tarixi faktın xatırlanması deyil, həm də Azərbaycanın gücünün, dövlət iradəsinin və xalqın birliyinin nümayişidir. Xocalı kimi faciəvi bir səhifənin yazıldığı, minlərlə günahsız insanın qurban verildiyi torpaqda indi sülhün və azadlığın simvolu olan üçrəngli bayrağımızın dalğalanması xalqımızın mətinliyini və tarixi ədalətin təntənəsini göstərir.
Xankəndi, Xocalı, Xocavənd və Ağdərə şəhərləri günü təkcə işğaldan azad edilmiş torpaqlarımızın qürurla yad edilməsi deyil, həm də gələcək nəsillərə vətən sevgisinin, dövlətçilik ənənələrinin aşılanması baxımından böyük əhəmiyyət daşıyır. Bu gün hər bir azərbaycanlının qəlbində milli həmrəyliyin, azadlıq sevgisinin və suveren dövlətimizin gücünə inamın təcəssümüdür.
Beləliklə, artıq ikinci dəfə qeyd edilən bu gün tariximizin ən parlaq səhifələrindən biri kimi daim yaşadılacaq, Azərbaycan xalqının milli kimliyini, qürurunu və əzmini gələcək nəsillərə ötürəcəkdir.
YAP Xəzər rayon təşkilatının fəalı
Mehriban Nadirova
