Müasir beynəlxalq münasibətlər sistemində dövlətlərin əksəriyyəti ya qlobal güclərin təsiri altına düşür, ya da regional maraqlara tabe olmaq məcburiyyətində qalır. Belə bir şəraitdə milli maraqlara əsaslanan, prinsipial və müstəqil siyasət yürütmək xüsusi cəsarət və siyasi iradə tələb edir. Bu baxımdan Macarıstan müstəqil siyasət aparan nadir ölkələrdən biri kimi fərqlənir. Bu faktı Azərbaycan Respublikasının Prezidenti İlham Əliyev 21 may 2025-ci il tarixində Macarıstana etdiyi işgüzar səfəri zamanı mətbuata verdiyi bəyanatında da xüsusi vurğulamışdır.
Macarıstanın xarici siyasəti hər zaman öz milli maraqlarına əsaslanıb. Avropa İttifaqı və NATO kimi güclü beynəlxalq təşkilatların üzvü olan bu ölkə, bir çox hallarda bu qurumların vahid mövqeyindən fərqli olaraq öz müstəqil baxışını ortaya qoyur. Məsələn, enerji siyasəti sahəsində Macarıstan Rusiyadan qaz almağa davam etməklə qlobal təzyiqlərə qarşı durmağı bacarmışdır. Bu, onun yalnız iqtisadi maraqlarını deyil, həm də enerji təhlükəsizliyini qorumağa yönəlmiş müstəqil yanaşmasının nümunəsidir.
Bundan başqa, Macarıstan ikitərəfli münasibətlərə xüsusi önəm verir. Azərbaycanla münasibətlərində də bu yanaşma özünü göstərir. Macarıstan Azərbaycanın ərazi bütövlüyünü və suverenliyini daim dəstəkləyən ölkələrdən biri olmuşdur. Hər iki dövlətin qarşılıqlı hörmət və bərabərhüquqluluq prinsiplərinə əsaslanan əməkdaşlığı regional və qlobal miqyasda müstəqil siyasətin təzahürüdür.
Macarıstan rəhbərliyinin cəsarətli qərarlar qəbul etməsi və beynəlxalq arenada öz mövqeyini açıq şəkildə ifadə etməsi bu ölkəni digərlərindən fərqləndirir. Bu, həm daxili siyasi sabitliklə, həm də xalqın hökumətə olan inamı ilə bağlıdır. Belə şəraitdə yürüdülən müstəqil siyasət həm ölkənin inkişafına, həm də beynəlxalq nüfuzuna xidmət edir.
Prezident İlham Əliyevin səfər zamanı səsləndirdiyi “Macarıstan müstəqil siyasət aparan nadir ölkələrdən biridir” fikri təkcə diplomatik jest deyil, real siyasi münasibətlərin və strateji baxışların göstəricisidir. Bu cür müstəqil siyasət yürüdən ölkələrin əməkdaşlığı daha səmərəli və uzunmüddətli olur.
Nəticə olaraq, Macarıstanın müstəqil və prinsipial siyasəti təkcə öz dövlət maraqlarına xidmət etmir, həm də beynəlxalq münasibətlər sistemində balans yaradır. Bu siyasət həm Azərbaycanla münasibətlərdə, həm də qlobal məsələlərdə açıq şəkildə özünü göstərir və onu “nadir” edən də məhz budur.
Gülnar Qurbanova,
YAP Şuşa rayon təşkilatının 22 saylı ərazi partiya təşkilatının sədri
