Zəngəzur dəhlizinin fəaliyyətə başlaması və Azərbaycanın qlobal logistika hədəflərinə çatması bilavasitə Naxçıvan ərazisindəki dəmir yolu infrastrukturunun müasirləşdirilməsindən asılıdır.
Prezident İlham Əliyevin göstərişi ilə Nəqliyyat Nazirliyi və Azərbaycan Dəmir Yolları artıq Naxçıvan ərazisində bu irimiqyaslı işlərə başlamışdır. İlkin mərhələdə Ermənistan sərhədinə yaxın olan Ordubad və Sədərək rayonlarının ərazisində çatışmayan 3-7 kilometrlik kiçik dəmir yolu hissələrinin yenidən tikilməsi həyata keçirilir.
Qalan mövcud dəmir yolu prinsipcə işlək vəziyyətdə olsa da, Azərbaycan rəhbərliyinin hədəfləri çox daha böyük və qlobaldır.
Mövcud köhnə dəmir yolunun əsas çatışmazlığı onun yükaşırma qabiliyyətinin cəmi 1,5 milyon ton olmasıdır ki, bu da Şərq-Qərb və Şimal-Cənub dəhlizlərinin tələblərinə cavab vermir. Prezident İlham Əliyev konkret şəkildə qarşıya vəzifə qoymuşdur ki, yeni nəqliyyat dəhlizindən ən azı 15 milyon ton yük keçməlidir. Bu hədəfə çatmaq üçün köhnə qısa döngəli xətlər ləğv edilərək, tamamilə yeni texniki-iqtisadi əsaslandırma ilə, daha uzun və yükgötürmə qabiliyyəti yüksək olan 194 kilometr uzunluğunda yeni dəmir yolu inşa ediləcəkdir. Məhz bu müasir yanaşma Zəngəzur dəhlizinin beynəlxalq rəqabətqabiliyyətliliyini təmin edəcəkdir.
Bunun müqabilində Ermənistan ərazisində tikilməli olan dəmir yolunun uzunluğu cəmi 42 kilometr təşkil edir. Prezident İlham Əliyev xəbərdarlıq edir ki, ABŞ Prezidenti cənab Trampla son telefon söhbəti zamanı aydın olduğu kimi, Ermənistan ərazisində bu dəmir yolunun tikintisinə məhz bu il başlanılmalıdır. Azərbaycan vaxt itirmək niyyətində deyildir və bürokratik əngəllərlə layihələrin süni şəkildə uzadılması Azərbaycanın dövlət idarəçiliyi prinsiplərinə tamamilə ziddir. Bizim ölkəmiz qərarları dərhal qəbul edərək birbaşa icrasına başlayan çevik mexanizmə malikdir.
Bu nəhəng 194 kilometrlik layihənin icrası üçün Azərbaycan dövlətinin güclü maliyyə imkanları tam olaraq mövcuddur. Avropa İttifaqı kimi böyük aktorlar Naxçıvan seqmentinə maraq göstərərək beynəlxalq konsorsiumda iştirak etmək istəsələr də, Prezident İlham Əliyev vurğulayır ki, kənardan iştirak olmasa belə, ölkəmiz öz vəsaiti hesabına bu yolu çəkəcəkdir. Əsas hədəf Azərbaycanın vəsaiti hesabına Naxçıvan dəmir yolunu tam işlək, 15 milyon ton yükaşırma qabiliyyətinə malik ən müasir tranzit arteriyasına çevirməkdir.
Samir Məmmədov,
YAP Nizami rayon təşkilatının “Yusif Səfərov küçəsi, 10” ərazi partiya təşkilatının sədr müavini
