daha təsdiqlədi
Azərbaycan dünya enerji xəritəsində özünəməxsus yerini qoruyub saxlamaqla yanaşı, onu daha da gücləndirməyə davam edir. Bunu bir daha 2025-ci il iyunun 2-də Bakı Ekspo Mərkəzində keçirilən Bakı Enerji Həftəsinin rəsmi açılış mərasimində Prezident İlham Əliyevin çıxışı təsdiqlədi. Cənab Prezidentin nitqi həm enerji sektorunun dinamikası, həm də Azərbaycanın strateji gələcək hədəfləri baxımından ciddi məna daşıyır. “Caspian Oil and Gas” sərgisinin 30 illiyi sadəcə bir tədbirin deyil, Azərbaycanın müasir enerji tarixinin yubileyidir. Prezident İlham Əliyevin çıxışında da bu müddət ərzində əldə edilən uğurlar xronoloji ardıcıllıqla qeyd edildi. Neft kontraktlarından başlayaraq Cənub Qaz Dəhlizi kimi nəhəng layihələrə qədər uzanan bu yol, Azərbaycanın enerji sahəsində milli maraqlarını qorumaqla yanaşı, beynəlxalq tərəfdaşlıqlara da töhfə vermək qabiliyyətinin göstəricisidir. Prezidentin vurğuladığı kimi, Azərbaycan 1994-cü ildən bəri heç bir müqaviləni birtərəfli şəkildə pozmamış, əksinə, xarici investorlar üçün etibarlı tərəfdaş olaraq nüfuz qazanmışdır. Bu, ölkənin enerji diplomatiyasının əsas dayaqlarından biridir.
İlham Əliyevin çıxışında diqqət çəkən əsas məqamlardan biri Azərbaycanın yaşıl enerji sahəsində atdığı konkret addımlar oldu. Söz yox ki, bərpa olunan enerji artıq sadəcə ekoloji məsələ deyil – bu, milli təhlükəsizlik, iqtisadi şaxələndirmə və texnoloji müstəqillik məsələsidir. Prezident bildirdi ki, 2030-cu ilə qədər Azərbaycanın elektrik enerjisi ixracının əhəmiyyətli hissəsi günəş və külək enerjisi hesabına təmin olunacaq. Şərqi Zəngəzur və Qarabağ bölgələrinin yaşıl enerji zonası elan olunması və artıq bir neçə beynəlxalq şirkətlə imzalanan müqavilələr bu istiqamətdə iradənin və fəaliyyətin real olduğunu göstərir. Bu strategiya Azərbaycanı təkcə karbohidrogen ixracatçısı deyil, eyni zamanda bərpa olunan enerji texnologiyalarının regiondakı aparıcı qüvvəsinə çevirə bilər. Azərbaycanın enerji siyasəti təkcə iqtisadi deyil, həm də geosiyasi sabitliyin mühüm vasitəsidir. Prezidentin çıxışında bu aspekt xüsusi yer aldı. Prezident İlham Əliyev qeyd etdi ki, ölkəmizin təşəbbüsü ilə həyata keçirilən enerji layihələri region ölkələrini birləşdirir, qarşılıqlı asılılıq və əməkdaşlıq mühitini formalaşdırır. Xəzər hövzəsindəki sabitlik və enerji resurslarının təhlükəsiz daşınması, təkcə Azərbaycana deyil, Avropaya da fayda verir. Bu səbəbdən Avropa İttifaqı və digər beynəlxalq təşkilatlar Azərbaycanın enerji siyasətinə xüsusi önəm verir.
Prezident İlham Əliyevin Bakı Enerji Həftəsindəki çıxışı bir daha göstərdi ki, Azərbaycan təkcə enerji resurslarına malik ölkə deyil, bu resursları ağıllı, dayanıqlı və strateji şəkildə idarə edən lider dövlətdir. Ölkənin enerji siyasəti təkcə bu günün deyil, gələcəyin maraqlarını da nəzərə alır. Azərbaycan artıq öz enerji strategiyasını regional və qlobal səviyyədə müəyyənləşdirən aparıcı oyunçudur. Prezidentin bu tədbirdə səsləndirdiyi fikirlər isə bu mövqenin yalnız möhkəmlənəcəyindən xəbər verir.
Mirsadıq Səməndərli,
Yeni Azərbaycan Partiyası, məsləhətçi
