Azərbaycan Respublikasının Prezidenti İlham Əliyevin 2025-ci il avqustun 22-də Türkmənistana etdiyi səfər iki ölkə arasında münasibətlərin inkişafında yeni mərhələnin başlanğıcı olub. Bu səfər Azərbaycan-Türkmənistan münasibətlərinin strateji tərəfdaşlıq səviyyəsinə yüksəldilməsinə xidmət edib, regionda əməkdaşlıq üçün geniş imkanlar açıb.
Səfər çərçivəsində Azərbaycan Prezidenti ilə Türkmənistan Xalq Məsləhətinin sədri arasında təkbətək görüş keçirilib, ardınca geniş tərkibli danışıqlar aparılıb. Görüşlərdə ikitərəfli münasibətlərin mövcud vəziyyəti təhlil edilib, gələcək inkişaf istiqamətləri müəyyənləşdirilib. Xüsusilə nəqliyyat-logistika, enerji, elektrik sənayesi, neft-qaz sektoru, həmçinin mədəniyyət və humanitar əməkdaşlıq məsələləri müzakirələrin əsas mövzusu olub.
Qeyd edək ki, Azərbaycan və Türkmənistan arasında enerji sahəsində əməkdaşlıq xüsusi əhəmiyyət daşıyır. Azərbaycanın Avropa istiqamətinə çıxışı təmin edən Cənub Qaz Dəhlizi və Türkmənistanın böyük qaz ehtiyatları gələcəkdə bir-birini tamamlayan strateji imkanlar kimi qiymətləndirilir. Transxəzər qaz kəməri və digər potensial layihələr regionun enerji təhlükəsizliyinə, Avropanın diversifikasiya siyasətinə və türkdilli dövlətlərin əməkdaşlığına mühüm töhfə verə bilər. Məhz Prezident İlham Əliyevin Türkmənistana səfəri enerji sahəsində gələcək əməkdaşlığın əsasını daha da möhkəmləndirib.
Nəqliyyat sahəsi üzrə əməkdaşlıq da iki ölkə münasibətlərində prioritet istiqamətlərdən biridir. Xəzər dənizi hər iki ölkə üçün təbii körpü rolunu oynayır. Bakı və Türkmənbaşı limanlarının potensialının artırılması, bərə daşımalarının gücləndirilməsi və multimodal nəqliyyat marşrutlarının yaradılması Orta Dəhlizin inkişafına xidmət edir. Səfər çərçivəsində müzakirə edilən məsələlər göstərdi ki, Azərbaycan və Türkmənistan Avrasiya məkanında tranzit imkanlarının genişləndirilməsində mühüm rol oynayacaqlar.
Türkmənistan-Azərbaycan-Özbəkistan formatında keçirilən yüksək səviyyəli üçtərəfli görüş də regional əməkdaşlığın inkişafında xüsusi əhəmiyyət kəsb edir. Bu format yalnız iqtisadi və logistika məsələlərini deyil, həm də siyasi koordinasiyanı əhatə edir. Görüşün nəticəsi olaraq sənədlər imzalanıb, mətbuata birgə bəyanat təqdim edilib. Bu fakt bir daha göstərir ki, Azərbaycan çoxtərəfli əməkdaşlıq formatlarında fəal iştirak edir və region dövlətlərinin birgə fəaliyyətini təşviq edir.
Səfər çərçivəsində diqqət çəkən məqamlardan biri Türkmənistanın Azərbaycan Prezidentinə məşhur Axaltəkə atı hədiyyə etməsi olub. Bu jest sadəcə diplomatik protokol elementi deyil, həm də iki xalq arasında mədəni və tarixi yaxınlığın rəmzi kimi dəyərləndirilir. Türkmən xalqının qürur mənbəyi olan Axaltəkə atının təqdim olunması
Azərbaycan-Türkmənistan dostluğunun mədəni əsaslara söykəndiyini bir daha təsdiqləyib.
Tarixi baxımdan da Azərbaycan-Türkmənistan münasibətləri daim dostluq və qardaşlıq prinsiplərinə əsaslanıb. İki xalqın ortaq dəyərləri, mədəniyyəti, dini və mənəvi yaxınlığı bu münasibətlərin sabitliyinin təminatıdır. Prezident İlham Əliyevin Türkmənistana səfəri bu tarixi köklərə söykənən dostluğun daha möhkəm əsaslar üzərində inkişaf edəcəyini bir daha sübut edib.
Nəticə etibarilə, Prezident İlham Əliyevin Türkmənistana səfəri Azərbaycan–Türkmənistan münasibətlərinin inkişafında yeni bir mərhələ açıb. Bu səfər zamanı əldə olunmuş razılaşmalar, imzalanmış sənədlər və aparılmış müzakirələr iki ölkə arasında strateji tərəfdaşlığın daha da möhkəmlənməsinə xidmət edib. Səfər həmçinin regionda yeni əməkdaşlıq formatlarının yaranmasına, Türk dünyasının inteqrasiyasının güclənməsinə və Avrasiyada sabitliyin möhkəmlənməsinə töhfə verir. Azərbaycan bu səfərlə bir daha sübut edib ki, yalnız öz milli maraqlarını deyil, həm də dost və qardaş xalqların ortaq gələcəyini düşünən, təşəbbüskar və lider bir dövlətdir.
Vaqif Vəlibəyli,
YAP Nizami rayon təşkilatının könüllüsü
