2025-ci il oktyabrın 21-də Astanada Azərbaycan Respublikasının Prezidenti İlham Əliyevin iştirakı ilə keçirilən Azərbaycan–Qazaxıstan Ali Dövlətlərarası Şurasının ikinci iclası iki ölkə arasında əməkdaşlığın yeni mərhələsinin başlanğıcı oldu. Prezidentin mətbuata verdiyi bəyanat bu münasibətlərin artıq sadəcə dostluq deyil, dərin strateji tərəfdaşlıq xarakteri daşıdığını bir daha təsdiqlədi.
Prezident İlham Əliyev çıxışında Qazaxıstanın son illərdə keçdiyi inkişaf yoluna yüksək qiymət verdi. O vurğuladı ki, Prezident Kasım-Jomart Tokayevin rəhbərliyi ilə həyata keçirilən islahatlar, süni intellekt və müasir texnologiyaların tətbiqi Qazaxıstanı regionun ən dinamik və müasir dövlətlərindən birinə çevirib. Bu inkişaf yalnız daxili sabitliklə məhdudlaşmır, eyni zamanda ölkənin beynəlxalq nüfuzunu da gücləndirir.
Qazaxıstanın Qarabağın bərpasında iştirakı iki ölkə münasibətlərinə mənəvi dəyər qazandırır. Füzulidə açılan Kurmanqazı adına Uşaq Yaradıcılıq Mərkəzi bu dostluğun simvoluna çevrilib. Prezident İlham Əliyev çıxışında qeyd edib ki, bu mərkəz təkcə təhsil ocağı deyil, həm də xalqlarımızın dostluq və qarşılıqlı hörmətinin parlaq göstəricisidir.
Azərbaycan və Qazaxıstanın iştirakı ilə həyata keçirilən nəqliyyat və logistika layihələri – xüsusilə Orta Dəhliz və Zəngəzur dəhlizi – Avrasiya məkanını birləşdirən mühüm iqtisadi arteriyaya çevrilməkdədir. Prezident İlham Əliyev qeyd edib ki, 2028-ci ilə qədər Zəngəzur dəhlizinin istifadəyə verilməsi planlaşdırılır və bu, Asiya ilə Avropa arasında yükdaşımaların həcmini əhəmiyyətli dərəcədə artıracaq. TRIPP və Xəzər dibi elektrik kabeli layihələri də bu əməkdaşlığın strateji dərinliyini daha da artırır.
Prezident İlham Əliyevin Astanadakı çıxışı Azərbaycan–Qazaxıstan münasibətlərinin dərin məzmununu və strateji istiqamətini aydın şəkildə ortaya qoydu. Bu münasibətlər sadəcə diplomatik tərəfdaşlıq deyil, ortaq tarix, qarşılıqlı etimad və gələcəyə yönəlmiş birgə baxışın ifadəsidir.
Bu gün Azərbaycan və Qazaxıstan yalnız regionda deyil, bütövlükdə Avrasiya məkanında sülh, əməkdaşlıq və inkişafın etibarlı dayaqları kimi çıxış edirlər.
Aytac Məhərrəmli
YAP Nizami rayon təşkilatının məsləhətçisi
