“Yollar artıq sadəcə nəqliyyatın hərəkət etdiyi məkan deyil. Təəssüf ki, bu gün yollar yüzlərlə insanın yarımçıq qalan həyat hekayəsinin son ünvanına çevrilib. Sükan arxasında bir anlıq tələskənlik, bir saniyəlik məsuliyyətsizlik, “mənə heç nə olmaz” düşüncəsi bir çox hallarda geri dönüşü olmayan faciə ilə bitir”.
Obyektivxeber.az “Qafqazinfo” xəbər verir ki, bu fikirləri Baş DYP İdarəsinin İctimaiyyətlə əlaqələr şöbəsinin rəisi Rövşən Tağıyev bildirib.
O, hadisələrin səbəbinin əksər hallarda dəyişmədiyini vurğulayıb: “Sürət həddi aşılır, əks zolağa çıxılır, qırmızı işıqda keçilir, sərxoş halda sükan arxasına əyləşilir, telefonla danışaraq avtomobil idarə edilir. Və nəticə dəyişmir… Dağılan ailələr, ömürlük vicdan əzabı, uşaqsız qalan analar, atasız böyüyən körpələr, yarımçıq qalan arzular… Bu gün yollar yüzlərlə insanın həyatını udub… Sabahın kimə qismət olacağını isə heç kim bilmir. Bəlkə də, növbəti qurban elə bir neçə saniyə sonra sükan arxasında risk edən bir sürücüdür. Bəlkə də, yol kənarında dayanan günahsız bir piyadadır. Bəlkə də, evinə tələsən bir ata, dərsə gedən bir tələbə, toyuna hazırlaşan bir gəncdir…”
DYP rəsmisi bildirib ki, sükan arxasında edilən kobud qayda pozuntusu təkcə sürücünün deyil, günahsız insanların da həyatını əlindən alır: “Bu gün qaydanı pozan sürücü sabahın xəbər başlığına çevrilə bilər. Bu gün “mənə heç nə olmaz” deyən sabah şəkli çərçivəyə salınan bir xatirəyə dönə bilər. Gəlin bir anlıq tələskənliyə görə ailələrin göz yaşına səbəb olmayaq. Gəlin sükan arxasına keçəndə yalnız öz həyatımızı deyil, başqalarının da taleyini daşıdığımızı unutmayaq”
