Dünyada bərpaolunan enerji mənbələrinə marağın artdığı bir dövrdə Azərbaycan da bu istiqamətdə həyata keçirdiyi uğurlu siyasətlə diqqət mərkəzindədir. Prezident İlham Əliyevin rəhbərliyi ilə yaşıl enerji sahəsində görülən işlər ölkəmizin dayanıqlı inkişaf strategiyasının mühüm tərkib hissəsinə çevrilib.
Avropa Komissiyasının Prezidenti Ursula Fon der Lyayenin Azərbaycana səfəri zamanı yaşıl enerji məsələləri əsas müzakirə mövzularından biri oldu. Bu, Avropa İttifaqının Azərbaycanın bu sahədəki potensialına verdiyi yüksək qiymətin göstəricisidir. Günəş, külək və su elektrik enerjisi üzrə həyata keçirilən layihələr ölkəmizin enerji təhlükəsizliyini daha da gücləndirməklə yanaşı, yeni ixrac imkanları yaradır.
Azərbaycanın zəngin təbii potensialı bərpaolunan enerji istehsalını genişləndirmək üçün əlverişli şərait yaradır. Xarici və yerli investorlarla bağlanmış müqavilələr yaxın illərdə minlərlə meqavat gücündə yeni enerji istehsalının təmin olunmasına imkan verəcək. Bu isə ölkəmizin iqtisadi inkişafına, yeni iş yerlərinin yaradılmasına və ətraf mühitin qorunmasına mühüm töhfə verəcək.
Yaşıl enerji sahəsində əməkdaşlığın genişlənməsi Azərbaycanın beynəlxalq mövqeyini daha da gücləndirir. Bu istiqamətdə həyata keçirilən layihələr ölkəmizin innovativ inkişaf modelinə sadiq olduğunu və qlobal iqlim məqsədlərinə töhfə verməyə hazır olduğunu göstərir.
Prezident İlham Əliyevin müəyyən etdiyi inkişaf strategiyası nəticəsində Azərbaycan ənənəvi enerji sahəsində olduğu kimi, yaşıl enerji istiqamətində də etibarlı tərəfdaş kimi tanınır. Bu siyasət ölkəmizin gələcək iqtisadi inkişafını təmin etməklə yanaşı, regionda enerji əməkdaşlığının yeni mərhələsini formalaşdırır.
Zərifə Məmmədzadə,
YAP Nizami rayon təşkilatının fəalı
