Qlobal sülh və ədalət axtarışında Azərbaycanın prinsipial mövqeyi təkcə regional məsələlərlə məhdudlaşmır, həm də bəşəri miqyasda insan hüquqlarının müdafiəsini əhatə edir. Şuşa Qlobal Media Forumunda Prezident İlham Əliyev xatırlatmışdır ki, Avropa Şurasına qəbul olunarkən Azərbaycan nümayəndə heyətinə insan hüquqlarının heç bir ölkənin daxili işi hesab edilə bilməyəcəyi öyrədilmişdi. İndi isə Bakı Təşəbbüs Qrupu dünyada müstəmləkəçilik və ondan irəli gələn bərabərsizlik məsələlərini qaldırdıqda, Azərbaycan əsassız olaraq Fransanın daxili işlərinə qarışmaqda və hibrid müharibə aparmaqda ittiham edilir. Halbuki, insan hüquqları ilə bağlı bu məsələlər tamamilə ümumbəşəri xarakter daşıyır. Uzun illər ərzində Fransanın Yeni Kaledoniya, Polineziya, Martinika kimi qondarma dənizaşırı ərazilərində (faktiki müstəmləkələrində) qanunsuz əməllər törədilmiş, çoxlu sayda insanın həyatına və sağlamlığına zərər vuran nüvə sınaqları keçirilmişdir.
Azərbaycanın bu xalqların səsini beynəlxalq tribunalara çıxarması və Bakı Təşəbbüs Qrupunun fəaliyyəti tarixi ədalətin bərpası baxımından olduqca vacibdir. XXI əsrdə bir dövlətin özündən 10 min kilometr uzaqlıqda yerləşən və onu istəməyən xalqlara müstəmləkə kimi sahib olması qəbuledilməzdir. Dünyanın müxtəlif ərazilərində, hətta Avropanın mərkəzindəki Korsikada belə, insanlar öz dillərini qorumaq, kənardan idarə olunmadan və ləyaqətlə yaşamaq istəyirlər. Lakin bu xalqların zəif səsləri koordinasiyalı hücum qrupları tərəfindən susdurulur, onlara təzyiq göstərilir, hətta tədbirlərdə iştirak edən şəxslər Fransa və İsveçrədə saxlanılaraq həbs edilirlər. Bütün bunlar isə dünyaya demokratiya dərsi keçməyə çalışanların gözü qarşısında baş verir.
Azərbaycanın bu məsələlərə belə həssas yanaşmasının dərin tarixi kökləri var. Ölkəmiz özü də həm XIX əsrdə, həm də Sovet dövründə müstəmləkə şəraitində yaşamış, sərvətləri talan edilmiş, ekoloji fəlakətlərlə üzləşmişdir. Müstəqilliyini bərpa etdikdən sonra isə Azərbaycan bu zərərləri aradan qaldırmaq üçün milyardlarla vəsait xərcləmiş və nəticədə müasir, güclü bir orta güc dövlətinə çevrilmişdir. Məhz buna görə də Azərbaycan Yeni Kaledoniyanın, Polineziyanın və digər xalqların azadlığını səmimiyyətlə dəstəkləyir. Dövlət başçısı xüsusilə vurğulayır ki, bunun Fransa ilə ikitərəfli münasibətlərə heç bir aidiyyəti yoxdur; bu, sadəcə olaraq iki suveren dövlət arasında mövqelərin ifadə edilməsi və beynəlxalq davranışın fundamental prinsiplərinin müdafiəsidir.
Regina Kovalyova,
YAP Nizami rayon təşkilatının fəalı
