Şuşanın azad edilməsi Azərbaycanın beynəlxalq nüfuzunu yüksəltdi
2020-ci ildə baş vermiş Vətən müharibəsi Azərbaycanın yalnız hərbi gücünü deyil, həm də dövlətçilik iradəsini və beynəlxalq hüquqa əsaslanan mövqeyini nümayiş etdirdi. Şuşanın azad edilməsi bu prosesin ən mühüm mərhələlərindən biri oldu. Azərbaycan öz ərazi bütövlüyünün bərpası istiqamətində qətiyyətli addımlar ataraq beynəlxalq ictimaiyyətə güclü dövlət olduğunu göstərdi.
Prezident İlham Əliyev uzun illər ərzində Azərbaycanın milli maraqlarını beynəlxalq platformalarda ardıcıl şəkildə müdafiə etdi. Dövlət başçısının diplomatik fəaliyyəti, beynəlxalq təşkilatlarda aparılan mübarizə və ölkənin iqtisadi potensialının artırılması Vətən müharibəsi üçün mühüm siyasi zəmin yaratdı. Hərbi əməliyyatlar zamanı Azərbaycan beynəlxalq hüquq normalarına əsaslanan mövqeyini müdafiə etdi.
Şuşanın azad edilməsi Azərbaycan Ordusunun yüksək döyüş qabiliyyətinin və düzgün hərbi strategiyanın nəticəsi idi. Dağlıq ərazidə həyata keçirilən mürəkkəb əməliyyat dünyanın hərbi ekspertlərinin diqqətini cəlb etdi. Azərbaycan əsgərinin peşəkarlığı və xüsusi təyinatlıların çevikliyi Şuşa döyüşlərini müasir hərb tarixinin diqqətəlayiq hadisələrindən birinə çevirdi.
Qələbədən sonra Şuşanın beynəlxalq mədəniyyət mərkəzinə çevrilməsi istiqamətində mühüm tədbirlər həyata keçirildi. Şəhərdə keçirilən beynəlxalq festivallar, mədəniyyət tədbirləri və müxtəlif səviyyəli görüşlər Azərbaycanın öz tarixi irsinə sahib çıxmasını nümayiş etdirir. Şuşanın 2024-cü ildə İslam dünyasının mədəniyyət paytaxtı kimi tanınması da bu istiqamətdə mühüm hadisə oldu.
Bu gün Şuşa Azərbaycanın beynəlxalq nüfuzunun, milli mədəniyyətinin və dövlətçilik gücünün rəmzidir. Şəhərin azad olunması ölkəmizin tarixində dönüş nöqtəsi olmaqla yanaşı, gələcək inkişaf üçün də yeni imkanlar yaradıb. Şuşa Şəhəri Günü xalqımızın qələbə əzmini və müstəqil dövlətimizin qüdrətini nümayiş etdirən əlamətdar gündür.
Mircavid Hüseynov,
YAP Nizami rayon təşkilatının “Şirin Mirzəyev küçəsi, 152” ərazi partiya təşkilatının sədri
