
Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında münasibətlərin inkişafı ölkəmizin beynəlxalq əlaqələrinin genişləndirilməsi baxımından mühüm əhəmiyyət daşıyır. İki dövlət arasında uzun illərə əsaslanan dostluq və əməkdaşlıq əlaqələri 2026-cı il noyabrın 12-də imzalanmış Strateji Tərəfdaşlıq haqqında Birgə Bəyannamə ilə yeni mərhələyə yüksəlib.
Sənəd Azərbaycan Respublikasının Prezidenti İlham Əliyev və Böyük Britaniya və Şimali İrlandiya Birləşmiş Krallığının Baş naziri Endi Börnham tərəfindən Dublin şəhərində imzalanıb. Bu Bəyannamə iki ölkə arasında qarşılıqlı hörmətə, ortaq maraqlara və praktiki əməkdaşlığa əsaslanan münasibətlərin daha da gücləndirilməsini nəzərdə tutur.
Bəyannamənin əsas istiqamətlərindən biri müdafiə və təhlükəsizlik sahəsində əməkdaşlığın genişləndirilməsidir. Tərəflər regional sülhün və sabitliyin qorunması, təhlükəsizlik çağırışlarına qarşı birgə mübarizə, müdafiə sahəsində təlim və təcrübə mübadiləsinin inkişaf etdirilməsi məsələlərində əməkdaşlığı gücləndirmək niyyətlərini ifadə ediblər. Həmçinin hüquq-mühafizə orqanları, sərhəd təhlükəsizliyi və hüquqi əməkdaşlıq məsələlərinə xüsusi diqqət yetirilib.
Bəyannamənin digər mühüm istiqaməti iqtisadiyyat, ticarət və investisiya əlaqələrinin inkişafıdır. Sənəddə enerji, bərpaolunan enerji mənbələri, infrastruktur, nəqliyyat və logistika sahələrində əməkdaşlığın genişləndirilməsi nəzərdə tutulur. Xüsusilə Orta Dəhlizin inkişafı və beynəlxalq nəqliyyat əlaqələrinin gücləndirilməsi hər iki ölkənin iqtisadi maraqları baxımından əhəmiyyətli hesab olunur. Maliyyə bazarları, yaşıl maliyyələşmə və kiçik və orta sahibkarlığın inkişafı da əməkdaşlığın prioritet istiqamətləri sırasındadır.
Sənəddə təhsil, elm və innovasiya məsələləri də mühüm yer tutur. Ali təhsil müəssisələri və elmi-tədqiqat institutları arasında əlaqələrin genişləndirilməsi, rəqəmsal bacarıqların inkişafı, süni intellekt və müasir texnologiyalar sahəsində təcrübə mübadiləsinin aparılması nəzərdə tutulur. Bu əməkdaşlıq gənclər üçün yeni imkanların yaranmasına, elmi potensialın artırılmasına və müasir biliklərin tətbiqinə töhfə verə bilər.
Bəyannamədə Azərbaycan ilə Ermənistan arasında münasibətlərin normallaşdırılması və regionda davamlı sülhün təmin olunması məsələsinə də toxunulub. Böyük Britaniya ikitərəfli dialoq yolu ilə regionda dayanıqlı sülhə nail olmaq səylərinə dəstəyini bir daha təsdiqləyib.
Sənədin mühüm müddəalarından biri də hər il Strateji Tərəfdaşlıq görüşlərinin keçirilməsidir. Bu görüşlər vasitəsilə əldə olunan nəticələrin qiymətləndirilməsi, gələcək prioritetlərin müəyyənləşdirilməsi və birgə təşəbbüslərin həyata keçirilməsi nəzərdə tutulur.
Ümumilikdə, Azərbaycan ilə Böyük Britaniya arasında imzalanmış Strateji Tərəfdaşlıq haqqında Birgə Bəyannamə ölkəmizin beynəlxalq əməkdaşlıq imkanlarının genişləndirilməsi, iqtisadi potensialının gücləndirilməsi və regional mövqeyinin möhkəmləndirilməsi baxımından mühüm siyasi sənəddir. Bu sənəd iki ölkə arasında mövcud əlaqələrin daha sistemli və çoxşaxəli şəkildə inkişafına, gələcək nəsillər üçün yeni əməkdaşlıq imkanlarının formalaşmasına xidmət edir.
Sübhan şərifli,
YAP Yasamal rayon təşkilatının fəal gənci



