Son altı il Azərbaycanın dövlətçilik tarixində mühüm siyasi və hüquqi dəyişikliklərlə yadda qalıb. 2020-ci ildə Vətən müharibəsində əldə edilmiş tarixi Zəfər, 2023-cü ildə dövlət suverenliyinin tam bərpası və azad edilmiş ərazilərdə genişmiqyaslı quruculuq prosesinin başlanması Konstitusiyanın müddəalarının ölkənin bütün ərazisində tətbiqi baxımından yeni mərhələ formalaşdırıb. Bu dövrü hüquqi baxımdan təhlil edərkən hərbi-siyasi hadisələrlə konstitusion dövlət quruluşu arasındakı əlaqəni düzgün qiymətləndirmək vacibdir. Çünki dövlətin ərazi bütövlüyü və suverenliyi onun konstitusion əsaslarının mühüm tərkib hissəsidir. 2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün bərpası istiqamətində həlledici mərhələ oldu. 44 gün davam edən hərbi əməliyyatlar nəticəsində ölkəmizin bir sıra əraziləri işğaldan azad edildi, noyabrın 8-də Şuşanın azad olunması isə müharibənin taleyinə ciddi təsir göstərdi. Noyabrın 10-da imzalanmış üçtərəfli bəyanat regionda yeni siyasi vəziyyətin formalaşmasına səbəb oldu. Müharibədən sonrakı dövrdə əsas vəzifələrdən biri azad edilmiş ərazilərdə dövlət idarəçiliyinin, hüquqi münasibətlərin, təhlükəsizlik sisteminin və sosial infrastrukturun bərpası idi. Konstitusiyanın preambulasında Azərbaycanın müstəqilliyini, suverenliyini və ərazi bütövlüyünü qorumaq dövlətin əsas məqsədlərindən biri kimi ifadə olunub. Bu baxımdan, Vətən müharibəsində əldə edilən nəticələr ölkənin konstitusion məqsədlərinin reallaşdırılması istiqamətində tarixi əhəmiyyət daşıyırdı. Lakin hərbi qələbədən sonra qarşıda daha mürəkkəb quruculuq vəzifələri dayanırdı. İşğaldan azad edilmiş ərazilərdə hüquqi idarəetmənin qurulması, mülkiyyət münasibətlərinin tənzimlənməsi, əhalinin qayıdışı və sosial-iqtisadi həyatın bərpası uzunmüddətli dövlət siyasəti tələb edirdi. 2021-ci ildən etibarən azad edilmiş ərazilərdə dövlət idarəçiliyinin və yeni inzibati münasibətlərin formalaşdırılması istiqamətində işlər sürətləndirildi. Prezidentin xüsusi nümayəndəlikləri institutunun yaradılması, iqtisadi rayonların yeni bölgüsünün müəyyən edilməsi, infrastruktur layihələrinin həyata keçirilməsi və bərpa prosesinin mərkəzləşdirilmiş qaydada idarə olunması bu mərhələnin əsas istiqamətlərindən idi. Azərbaycanın iqtisadi rayonlarının yeni bölgüsü ilə Qarabağ və Şərqi Zəngəzur iqtisadi rayonları formalaşdırıldı. Bu addım azad edilmiş ərazilərin iqtisadi potensialının daha sistemli qiymətləndirilməsi, investisiya imkanlarının müəyyənləşdirilməsi və regional inkişaf siyasətinin əlaqələndirilməsi baxımından əhəmiyyət daşıyırdı. Hüquqi dövlət quruculuğu baxımından burada əsas məsələ dövlət orqanlarının səlahiyyətlərinin qanunvericiliklə müəyyən edilməsi və idarəetmə fəaliyyətinin Konstitusiyanın prinsiplərinə uyğun həyata keçirilməsi idi.2022-ci ildə azad edilmiş ərazilərdə genişmiqyaslı bərpa işləri davam etdirildi. Yollar, hava limanları, enerji və kommunikasiya xətləri, yaşayış məntəqələri və sosial obyektlər üzrə layihələr həyata keçirildi.Bu proses Konstitusiyanın sosial dövlət prinsipinin əhəmiyyətini də ön plana çıxardı. Çünki dövlətin vəzifəsi ərazilərin fiziki bərpası ilə məhdudlaşmır. İnsanların təhlükəsiz yaşayışı, təhsil, səhiyyə, məşğulluq və sosial müdafiə imkanlarının təmin edilməsi də konstitusion öhdəliklərin mühüm tərkib hissəsidir.Konstitusiyanın 16-cı maddəsində sosial inkişaf və dövlətin iqtisadi siyasəti ilə bağlı müddəalar öz əksini tapır. Dövlət iqtisadiyyatın müxtəlif mülkiyyət formaları əsasında inkişafını, insanların rifahının yüksəldilməsini və sosial müdafiənin təmin olunmasını əsas məqsədlər sırasında müəyyən edir. Bu yanaşma azad edilmiş ərazilərin bərpasında xüsusi əhəmiyyət daşıyır. Yeni yaşayış məntəqələrinin yaradılması, əhalinin qayıdışı və iqtisadi fəaliyyətin təşkili sosial dövlət modelinin real tətbiqi baxımından mühüm sınaqdır. 2023-cü il sentyabrın 19–20-də keçirilən lokal xarakterli antiterror tədbirlərindən sonra Azərbaycan Respublikasının bütün ərazisində dövlət suverenliyi tam bərpa edildi. Bu hadisə müasir dövlətçilik tariximizin mühüm mərhələsi oldu. Dövlət suverenliyinin bərpası hüquqi baxımdan ölkənin bütün ərazisində Konstitusiyanın və qanunların tətbiqi, dövlət institutlarının vahid idarəetmə sistemində fəaliyyəti və milli qanunvericiliyin ümumi hüquqi məkan yaratması baxımından əhəmiyyətlidir. Uzun müddət dövlətin suveren hüquqlarının tam həyata keçirilə bilmədiyi ərazilərdə vahid hüquqi və inzibati sistemin təmin olunması yeni imkanlar yaratdı. Bununla yanaşı, mülkiyyət, torpaq münasibətləri, qeydiyyat, sosial təminat, təhsil, səhiyyə və digər hüquqi məsələlərin həlli üzrə geniş işlərə ehtiyac yarandı. 2023-cü ilin nəticələri göstərdi ki, dövlət suverenliyi yalnız siyasi və hərbi anlayış deyil. O, həmçinin qanunların tətbiqi, dövlət xidmətlərinin fəaliyyəti, vətəndaşların hüquqlarının qorunması və dövlət institutlarının bütün ərazilərdə səmərəli işləməsi ilə bağlıdır. 2024-cü il sentyabrın 19-da Prezident İlham Əliyevin sərəncamı ilə hər il sentyabrın 20-sinin Azərbaycan Respublikasında Dövlət Suverenliyi Günü kimi qeyd edilməsi qərara alındı. Sərəncamda 2023-cü il sentyabrın 20-də ölkənin bütün ərazisində qanunun aliliyinin təmin edildiyi və dövlət suverenliyinin bərpa olunduğu nəzərə alındı. Bu qərar dövlətçilik tarixində yeni siyasi-hüquqi mərhələnin ictimai yaddaşda möhkəmləndirilməsi baxımından əhəmiyyətlidir.2024-cü il həm də 2025-ci ilin “Konstitusiya və Suverenlik İli” elan olunmasına hazırlıq mərhələsi kimi diqqət çəkir. Dövlət suverenliyi ilə Konstitusiya arasında qarşılıqlı əlaqə daha geniş şəkildə ictimai müzakirəyə çıxarıldı. Burada mühüm məqam ondan ibarətdir ki, suverenliyin bərpası ilə yaranan yeni imkanlar hüquqi dövlət quruculuğunun keyfiyyətinin yüksəldilməsi üçün istifadə edilməlidir. Dövlətin bütün ərazisində hüquqi normaların tətbiqi ilə yanaşı, vətəndaşların hüquqi müdafiə imkanlarının genişləndirilməsi və dövlət xidmətlərinin əlçatanlığı da təmin olunmalıdır. 2024-cü il dekabrın 28-də Prezident İlham Əliyevin imzaladığı sərəncamla 2025-ci il Azərbaycan Respublikasında “Konstitusiya və Suverenlik İli” elan edildi. Bu qərarın qəbul edilməsi bir neçə mühüm tarixi hadisə ilə əlaqədar idi: 1995-ci il Konstitusiyasının qəbul edilməsinin 30-cu ildönümü, Vətən müharibəsində əldə edilmiş Zəfərin beşinci ildönümü və dövlət suverenliyinin tam bərpası. “Konstitusiya və Suverenlik İli” təşəbbüsü hüquqi dövlət quruculuğunun, dövlət müstəqilliyinin, ərazi bütövlüyünün və milli suverenliyin ictimai şüurda daha dərindən mənimsənilməsinə xidmət edən mühüm siyasi-hüquqi addım kimi qiymətləndirilə bilər. Bu ilin əsas əhəmiyyəti Konstitusiyanın tarixi rolunu xatırlatmaqla yanaşı, onun müasir dövlət idarəçiliyindəki funksiyasını, hüquqi təminatların inkişafını və vətəndaşların konstitusion biliklərinin artırılmasını gündəmə gətirməsidir. Konstitusiyanın 30 illiyi ölkəmizin keçdiyi inkişaf yolunu qiymətləndirmək üçün də əlverişli imkan yaratdı. Bu müddətdə Azərbaycan müstəqil dövlət institutlarını formalaşdırdı, iqtisadi və sosial sahələrdə mühüm dəyişikliklər həyata keçirdi, beynəlxalq mövqelərini möhkəmləndirdi və ərazi bütövlüyünü bərpa etdi.2026-cı il Azərbaycanın Konstitusiyasının qəbul edilməsinin 31-ci ildönümünün qeyd olunduğu ildir. Ötən dövrün nəticələri göstərir ki, ölkənin qarşısında duran əsas vəzifələrdən biri konstitusion prinsiplərin dövlət və cəmiyyət həyatında davamlı tətbiqini təmin etməkdir.Dövlət suverenliyinin tam bərpasından sonra azad edilmiş ərazilərdə hüquqi münasibətlərin tənzimlənməsi, yeni yaşayış məntəqələrinin qurulması, məcburi köçkünlərin qayıdışı, iqtisadi fəaliyyətin genişləndirilməsi və sosial xidmətlərin təşkili davam edən proseslərdir. Bu mərhələdə Konstitusiyanın əhəmiyyəti daha geniş məzmun qazanır. Çünki dövlətin bütün ərazilərində hüquqi idarəetmənin təmin edilməsi, vətəndaşların hüquqlarının qorunması və dövlət institutlarının səmərəli fəaliyyəti suverenliyin praktik məzmununu müəyyənləşdirir. Mən hesab edirəm ki, 2026-cı ilin əsas prioritetlərindən biri suverenliyin siyasi nəticələrini hüquqi institutların keyfiyyəti, vətəndaş məmnunluğu, sosial rifah və iqtisadi inkişaf göstəriciləri ilə möhkəmləndirmək olmalıdır. Konstitusiyanın qəbul edilməsinin əsas məqsədlərindən biri hüquqi dövlətin formalaşdırılmasıdır. Hüquqi dövlət anlayışı dövlət orqanlarının və vəzifəli şəxslərin fəaliyyətinin qanunla məhdudlaşdırılmasını, insan hüquqlarının qorunmasını, məhkəmə hakimiyyətinin müstəqilliyini və hüquqi məsuliyyət mexanizmlərinin işlək olmasını nəzərdə tutur.Hüququn aliliyi dövlət idarəçiliyinin bütün sahələrində tətbiq edilməli olan fundamental prinsipdir. Dövlət orqanlarının qərarları hüquqi əsaslara söykənməli, vətəndaşların müraciətləri obyektiv araşdırılmalı, mülkiyyət hüququ və digər qanuni maraqlar qorunmalıdır. Konstitusiyanın 7-ci maddəsində Azərbaycan hüquqi dövlət kimi müəyyən edilib. Bu müddəa dövlətin fəaliyyətinin hüquqi çərçivədə həyata keçirilməsini tələb edir. Bu məsələlərin həlli hüquqi dövlətin inkişafına və Konstitusiyanın real ictimai dəyərinin yüksəlməsinə xidmət edir.Burada xüsusilə məhkəmə hakimiyyətinin rolu qeyd edilməlidir. Məhkəmə vətəndaşın pozulmuş hüquqlarının bərpası, dövlət orqanlarının qərarlarının qanuniliyinin qiymətləndirilməsi və hüquqi mübahisələrin ədalətli həlli baxımından əsas institutlardan biridir. Hüquqi dövlətin gücü vətəndaşın hüququ pozulduqda həmin hüququn effektiv müdafiə mexanizminə çıxış imkanında özünü göstərir. Buna görə də hüquqi yardımın əlçatanlığı, məhkəmə qərarlarının vaxtında və tam icrası, hüquqi prosedurların sadələşdirilməsi xüsusi diqqət tələb edir.Konstitusiyanın iqtisadi münasibətlərə dair müddəaları Azərbaycanın sosial-iqtisadi inkişaf modelinin hüquqi əsaslarını müəyyən edir. Mülkiyyətin dövlət, xüsusi və bələdiyyə formalarının tanınması, sahibkarlıq azadlığı və iqtisadi fəaliyyətin sosial rifaha xidmət etməsi bu modelin əsas elementlərindəndir. Müasir dünyada dövlətlərin rəqabət qabiliyyəti yalnız təbii resurslar və istehsal imkanları ilə ölçülmür. Hüquqi sabitlik, mülkiyyət hüququnun qorunması, müqavilə münasibətlərinin etibarlılığı, rəqabət mühitinin sağlamlığı və investisiya təhlükəsizliyi də iqtisadi inkişafın əsas şərtləridir. Azərbaycan üçün qeyri-neft sektorunun inkişafı, sahibkarlığın genişləndirilməsi, kənd təsərrüfatının modernləşdirilməsi və regional iqtisadi imkanların artırılması xüsusi əhəmiyyət daşıyır. Konstitusiyanın 15-ci maddəsində iqtisadi inkişafın müxtəlif mülkiyyət formaları əsasında həyata keçirilməsi və insanların rifahının yüksəldilməsinə xidmət etməsi prinsipi müəyyənləşdirilib. Bu müddəa iqtisadi siyasətin sosial məqsədlərlə əlaqələndirilməsinin hüquqi əsasını təşkil edir. Aqrar sahə baxımından da Konstitusion təminatlar mühüm əhəmiyyət daşıyır. Torpaq mülkiyyəti, sahibkarlıq fəaliyyəti, əmək hüquqları, təbii resurslardan istifadə və ətraf mühitin mühafizəsi ilə bağlı hüquqi münasibətlər aqrar inkişafın əsasını təşkil edir. Xüsusilə azad edilmiş ərazilərdə kənd təsərrüfatının bərpası, torpaqların iqtisadi dövriyyəyə qaytarılması, suvarma sistemlərinin qurulması və fermerlərin fəaliyyətinin dəstəklənməsi hüquqi təminatlarla uzlaşdırılmalıdır. Torpaq resurslarının səmərəli idarə olunması, ekoloji təhlükəsizliyin qorunması və sahibkarların qanuni maraqlarının müdafiəsi dayanıqlı iqtisadi inkişaf üçün mühüm şərtlərdir. Mənim qənaətimə görə, Konstitusiyanın iqtisadi mahiyyətinin daha geniş ictimai izahı vacibdir. Çünki vətəndaşın mülkiyyət hüququ, sahibkarlıq azadlığı və əmək hüququ onun gündəlik iqtisadi həyatına birbaşa təsir göstərən konstitusion təminatlardır. Konstitusiyanın mühüm istiqamətlərindən biri yerli özünüidarəetmənin hüquqi əsaslarının müəyyən edilməsidir. Yerli özünüidarəetmə vətəndaşların yaşadıqları ərazinin sosial, iqtisadi və ictimai məsələlərinin həllində iştirakına imkan yaradan demokratik idarəetmə mexanizmidir.Azərbaycan Konstitusiyasının 9-cu fəslində bələdiyyələrin hüquqi statusu və fəaliyyətinin əsasları müəyyən edilib. Bələdiyyələr yerli əhəmiyyətli məsələlərin həllində iştirak edən seçkili özünüidarəetmə orqanlarıdır. Yerli özünüidarəetmənin səmərəliliyi bələdiyyələrin maliyyə imkanlarından, idarəetmə bacarıqlarından, vətəndaşlarla əlaqələrindən və yerli problemlərin həllində iştirak səviyyəsindən asılıdır. Müasir demokratik idarəetmə təcrübəsi göstərir ki, yerli səviyyədə qərarvermə proseslərinin inkişafı dövlətlə vətəndaş arasında etimadın möhkəmlənməsinə kömək edir. İnsanların yaşadıqları ərazidə abadlıq, kommunal xidmətlər, sosial layihələr və yerli inkişaf proqramları ilə bağlı qərarlarda iştirak etməsi ictimai məsuliyyət hissini artırır. Bu baxımdan, Azərbaycanda bələdiyyələrin institusional imkanlarının genişləndirilməsi, maliyyə müstəqilliyinin artırılması və yerli inkişaf layihələrinin daha səmərəli idarə olunması mühüm vəzifələrdəndir. Vətəndaş iştirakçılığı yalnız seçkilərdə iştirakla məhdudlaşmır. İctimai dinləmələr, vətəndaş müraciətləri, ictimai şuralar, ictimai nəzarət və qeyri-hökumət təşkilatlarının fəaliyyəti də demokratik idarəetmənin mühüm elementləridir. Vətəndaş cəmiyyətinin inkişafı dövlət institutlarının fəaliyyətinin daha şəffaf və hesabatlı olmasına, ictimai problemlərin müəyyənləşdirilməsinə və alternativ təkliflərin hazırlanmasına töhfə verir. XXI əsrdə texnologiyanın sürətli inkişafı hüquq sisteminin qarşısında yeni məsələlər qoyur. Rəqəmsal iqtisadiyyat, süni intellekt, elektron ticarət, şəxsi məlumatların qorunması və kibertəhlükəsizlik artıq müasir dövlət idarəçiliyinin ayrılmaz hissəsinə çevrilib. Bu dəyişikliklər Konstitusiyanın əsas prinsiplərinin yeni texnoloji mühitdə tətbiqini daha aktual edir. Məsələn, şəxsi həyatın toxunulmazlığı rəqəmsal dövrdə fərdi məlumatların qorunması ilə birbaşa əlaqəlidir. Fikir və söz azadlığı informasiya texnologiyalarının geniş yayılması ilə yeni ifadə imkanları qazanıb. Bununla yanaşı, rəqəmsal mühitdə şəxsi məlumatların qanunsuz istifadəsi, dezinformasiya, kibertəhdidlər və elektron xidmətlərin təhlükəsizliyi kimi problemlər də yaranıb. Dövlət idarəçiliyində rəqəmsal texnologiyaların tətbiqi xidmətlərin əlçatanlığını və operativliyini artırır. Elektron hökumət, rəqəmsal sənədləşmə, elektron məhkəmə və məlumat sistemlərinin inteqrasiyası vətəndaşların dövlət xidmətlərindən istifadə imkanlarını genişləndirir. Lakin rəqəmsallaşma zamanı hüquqi təminatlar da eyni sürətlə inkişaf etməlidir. Fərdi məlumatların qorunması, elektron identifikasiya, məlumat təhlükəsizliyi və süni intellekt sistemlərinin istifadəsində şəffaflıq əsas prioritetlərdən olmalıdır. Mən hesab edirəm ki, Azərbaycanın gələcək konstitusion inkişafında rəqəmsal hüquqların, informasiya təhlükəsizliyinin və texnoloji yeniliklərin hüquqi tənzimlənməsi mühüm istiqamətlərdən birinə çevriləcək. Konstitusion mədəniyyətin formalaşması ailədən, təhsil müəssisələrindən və ictimai mühitdən başlayır. Şagirdlərin və tələbələrin hüquqi biliklərinin artırılması, onların dövlətçilik tarixi və vətəndaş məsuliyyəti haqqında məlumatlandırılması gələcək hüquqi cəmiyyətin formalaşmasına xidmət edir. Bu baxımdan, Konstitusiya Günü ilə əlaqədar məktəblərdə, universitetlərdə, dövlət qurumlarında və ictimai təşkilatlarda maarifləndirici tədbirlərin keçirilməsi mühüm əhəmiyyət daşıyır. Belə tədbirlər Konstitusiyanın maddələrinin əzbərlədilməsi ilə məhdudlaşmamalı, onların insanların gündəlik həyatında hansı hüquqi təminatlar yaratdığını izah etməlidir. Azərbaycanın son üç onillikdə əldə etdiyi siyasi, iqtisadi və hüquqi nəticələr konstitusion dövlətçiliyin inkişafı üçün mühüm baza yaradıb. Bununla yanaşı, müasir çağırışlar yeni yanaşmaların və davamlı institusional təkmilləşmənin zəruriliyini ortaya qoyur. İlk növbədə, hüquqi maarifləndirmənin əhatə dairəsi genişləndirilməlidir. Vətəndaşların Konstitusiya ilə bağlı bilikləri gündəlik hüquqi məsələlərlə əlaqələndirilməli, hüquqi yardım və müdafiə mexanizmləri haqqında məlumatlılıq artırılmalıdır. İkinci istiqamət dövlət idarəçiliyində şəffaflığın və hesabatlılığın gücləndirilməsidir. Dövlət qurumlarının fəaliyyəti qanunçuluq, peşəkarlıq, operativlik və ictimai məsuliyyət prinsiplərinə əsaslanmalıdır. Üçüncü istiqamət məhkəmə-hüquq sisteminin inkişafıdır. Məhkəmə müdafiəsinin əlçatanlığı, hüquqi prosedurların səmərəliliyi və məhkəmə qərarlarının icrası vətəndaşların hüquqi təminatlarının real səviyyəsini müəyyənləşdirir. Dördüncü istiqamət insan hüquqlarının müdafiəsi mexanizmlərinin gücləndirilməsidir. Şəxsi həyatın toxunulmazlığı, mülkiyyət hüququ, əmək münasibətləri, sosial təminat və informasiya əldə etmək imkanları müasir cəmiyyətin əsas hüquqi ehtiyacları sırasındadır. Beşinci istiqamət yerli özünüidarəetmənin inkişafıdır. Bələdiyyələrin maliyyə və institusional imkanlarının genişləndirilməsi yerli problemlərin daha operativ həllinə və vətəndaş iştirakçılığının artmasına kömək edə bilər. Altıncı istiqamət rəqəmsal hüquqların qorunmasıdır. Süni intellekt, elektron xidmətlər, fərdi məlumatların təhlükəsizliyi və kibermühitdə hüquqi münasibətlər müasir qanunvericiliyin diqqət mərkəzində olmalıdır. Yeddinci istiqamət azad edilmiş ərazilərdə hüquqi və sosial inteqrasiyanın tamamlanmasıdır. Dövlət suverenliyinin bərpası ilə yaranmış imkanlar insanların təhlükəsiz yaşayışı, mülkiyyət münasibətlərinin tənzimlənməsi, məşğulluq və sosial xidmətlərin inkişafı ilə möhkəmləndirilməlidir. Bu vəzifələrin əlaqəli şəkildə həyata keçirilməsi Konstitusiyanın dövlət və cəmiyyət həyatında rolunu daha da gücləndirəcək. 12 Noyabr – Azərbaycan Respublikasının Konstitusiyası Günü müstəqil dövlətçiliyimizin hüquqi əsaslarını, xalqımızın suveren iradəsini və hüquqi dövlət quruculuğu istiqamətində keçdiyimiz tarixi yolu xatırladan mühüm gündür. 1995-ci ildə qəbul edilmiş Konstitusiya Azərbaycanın müstəqil dövlət kimi siyasi və hüquqi sisteminin formalaşmasında həlledici rol oynayıb. Sonrakı illərdə keçirilmiş referendumlar, dövlət idarəçiliyində aparılmış dəyişikliklər, hüquqi institutların inkişafı və sosial-iqtisadi islahatlar ölkənin konstitusion inkişafının müxtəlif mərhələlərini təşkil edib. 2020-ci ildə qazanılmış Zəfər, 2023-cü ildə dövlət suverenliyinin tam bərpası və 2025-ci ilin “Konstitusiya və Suverenlik İli” elan olunması bu ali sənədin müasir Azərbaycan tarixindəki əhəmiyyətini daha da artırıb.Lakin Konstitusiyanın həqiqi gücü onun mətnində təsbit olunmuş müddəaların gündəlik həyatda tətbiqi ilə ölçülür. İnsan hüquqlarının qorunması, qanunun aliliyinin təmin edilməsi, məhkəmə müdafiəsinin əlçatanlığı, dövlət orqanlarının məsuliyyəti, sosial rifahın yüksəldilməsi və vətəndaş iştirakçılığının genişləndirilməsi konstitusion dövlətçiliyin əsas göstəriciləridir. Mən hesab edirəm ki, Azərbaycanın gələcək inkişafında əsas məqsədlərdən biri əldə edilmiş siyasi və ərazi suverenliyini güclü hüquqi institutlar, yüksək vətəndaş məmnunluğu, sosial ədalət və davamlı iqtisadi inkişafla möhkəmləndirmək olmalıdır. Konstitusiyaya hörmət yalnız onun qəbul edildiyi günü qeyd etməklə deyil, hər gün onun prinsiplərinə uyğun davranmaqla, hüquqları qorumaqla, vəzifələri yerinə yetirməklə və dövlətçilik məsuliyyətini dərk etməklə ifadə olunur. Güclü dövlətin təməli güclü qanun, güclü qanunun dayağı isə ona hörmət edən cəmiyyət və hüquqları qorunan vətəndaşdır. Konstitusiya Azərbaycanın müstəqilliyinin hüquqi təminatı, suverenliyinin əsas dayağı və gələcək inkişafının yol xəritəsidir.
Fərid Mustafayev,
YAP Yasamal rayon təşkilatının fəalı
