Sülh və təhlükəsizlik müasir dövlətlərin davamlı inkişafı üçün əsas şərtlərdir. Uzunmüddətli münaqişələr iqtisadi tərəqqiyə, sosial rifaha və regional əməkdaşlığa ciddi maneələr yaradır. Azərbaycan Respublikasının Konstitusiyası dövlətin suverenliyini və ərazi bütövlüyünü əsas prinsip kimi müəyyənləşdirməklə ölkənin təhlükəsizlik və sülh siyasətinin hüquqi çərçivəsini formalaşdırır.
Azərbaycan uzun illər Ermənistanın işğalçılıq siyasəti nəticəsində ciddi humanitar və təhlükəsizlik problemləri ilə üzləşib. İşğal altında olan ərazilərdə dövlətin konstitusion hakimiyyətinin həyata keçirilməsi mümkün deyildi. Beynəlxalq hüququn ərazi bütövlüyü prinsipi və BMT Təhlükəsizlik Şurasının müvafiq qətnamələri bu münaqişənin hüquqi-siyasi çərçivəsini müəyyənləşdirirdi. Lakin uzun müddət münaqişənin sülh yolu ilə həlli istiqamətində nəticə əldə olunmadı.
2020-ci ildə Vətən müharibəsində qazanılmış Zəfər regionda yeni siyasi reallıqlar yaratdı. Azərbaycan Ordusunun uğurlu əməliyyatları nəticəsində torpaqlarımızın böyük hissəsi azad edildi. 2023-cü ildə ölkənin bütün ərazisində suverenliyin bərpası isə münaqişənin əvvəlki mərhələsinin başa çatması baxımından mühüm hadisə oldu. Bu prosesdən sonra regionda münasibətlərin yeni hüquqi və siyasi əsaslar üzərində qurulması məsələsi aktuallaşdı.
Prezident İlham Əliyevin rəhbərliyi ilə Azərbaycan regionda davamlı sülhün təmin olunması, sərhədlərin delimitasiyası, kommunikasiyaların açılması və qarşılıqlı əməkdaşlığın inkişafı istiqamətində mövqeyini ifadə edir. Sülh prosesinin beynəlxalq hüququn prinsiplərinə, dövlətlərin suverenliyinə və ərazi bütövlüyünə hörmət əsasında aparılması xüsusi əhəmiyyət daşıyır. Regional iqtisadi əlaqələrin genişlənməsi də təhlükəsizlik mühitinin yaxşılaşmasına töhfə verə bilər.
Konstitusiyanın müəyyən etdiyi suverenlik və ərazi bütövlüyü prinsipləri Azərbaycanın sülh siyasətinin əsas hüquqi dayaqlarıdır. Davamlı sülh yalnız siyasi bəyanatlarla deyil, hüquqi öhdəliklərin yerinə yetirilməsi və qarşılıqlı etimadın formalaşması ilə mümkündür. Azərbaycanın qarşısında duran strateji məqsəd əldə olunmuş tarixi nəticələri regional sabitlik və iqtisadi əməkdaşlıq üçün davamlı imkanlara çevirməkdir.
Gülanə Əliyeva,
YAP Nizami rayon təşkilatının “Cəmşid Naxçıvanski küçəsi, 312” ərazi partiya təşkilatının sədri
