Dövlət müstəqilliyinin qorunması üçün güclü və peşəkar ordunun mövcudluğu fundamental əhəmiyyət daşıyır. Silahlı Qüvvələr dövlətin suverenliyinin, ərazi bütövlüyünün və milli təhlükəsizliyinin müdafiəsində əsas institutlardan biri kimi çıxış edir. Azərbaycan Respublikasının Konstitusiyası Vətənin müdafiəsini və dövlətin müstəqilliyinin qorunmasını konstitusion vəzifə kimi müəyyənləşdirir.
Müstəqilliyin ilk illərində Azərbaycan Ordusunun formalaşdırılması mürəkkəb siyasi və hərbi şəraitdə həyata keçirilirdi. Dövlət idarəçiliyindəki problemlər, hərbi koordinasiyanın zəifliyi və işğal faktoru müdafiə sisteminin möhkəmləndirilməsini zəruri edirdi. Ümummilli Lider Heydər Əliyevin rəhbərliyi ilə Silahlı Qüvvələrin vahid komandanlıq prinsipləri əsasında qurulması və hərbi institutların inkişafı istiqamətində mühüm addımlar atıldı.
Prezident İlham Əliyevin rəhbərliyi dövründə ordunun modernləşdirilməsi, hərbi təhsilin inkişafı və müdafiə sənayesinin gücləndirilməsi dövlət siyasətinin prioritet istiqamətlərindən birinə çevrildi. Müasir silah sistemlərinin əldə olunması, beynəlxalq hərbi əməkdaşlıq və peşəkar kadr hazırlığı ordunun döyüş qabiliyyətini artırdı. Bu siyasət Azərbaycanın müdafiə potensialının yeni səviyyəyə yüksəlməsinə imkan yaratdı.
2020-ci ildə 44 günlük Vətən müharibəsində Azərbaycan Ordusunun qazandığı tarixi Zəfər dövlətçilik tariximizin ən mühüm hadisələrindən biridir. Müzəffər Ali Baş Komandan İlham Əliyevin rəhbərliyi ilə həyata keçirilən hərbi əməliyyatlar nəticəsində torpaqlarımızın böyük hissəsi işğaldan azad edildi. Azərbaycan əsgərinin qəhrəmanlığı və xalqın həmrəyliyi milli suverenliyin bərpasında həlledici rol oynadı.
Bu gün Azərbaycan Ordusu dövlət müstəqilliyinin və suverenliyin etibarlı müdafiəçisi kimi fəaliyyətini davam etdirir. Konstitusiyada müəyyən edilmiş Vətənin müdafiəsi prinsipi yalnız hərbi qulluqçuların deyil, bütün vətəndaşların dövlətçilik məsuliyyətini ifadə edir. Güclü ordu, möhkəm hüquqi sistem və milli birlik Azərbaycanın təhlükəsiz gələcəyinin əsas təminatlarıdır.
Fidan Əliyeva,
YAP Nizami rayon təşkilatının fəal üzvü
