Bakıdakı Heydər Əliyev Mərkəzində Azərbaycan Respublikasının Prezidenti, Yeni Azərbaycan Partiyasının (YAP) Sədri İlham Əliyevin sədrliyi ilə YAP-ın VIII Qurultayı keçirilib. Ölkənin ictimai-siyasi həyatında mühüm hadisə olan bu qurultay Azərbaycanın ərazi bütövlüyünün və suverenliyinin tam bərpasından sonra partiyanın keçirdiyi ilk ali tədbir olması baxımından müstəsna tarixi əhəmiyyət daşıyır.
Dövlət başçısı, YAP Sədri İlham Əliyev qurultaydakı geniş və proqram xarakterli çıxışında partiyanın keçdiyi şərəfli yola, ölkənin qazandığı möhtəşəm nailiyyətlərə və qarşıda duran strateji vəzifələrə ətraflı toxunub.
Prezident İlham Əliyev çıxışında Yeni Azərbaycan Partiyasının yaranma tarixinə nəzər salaraq, ümummilli lider Heydər Əliyevin hakimiyyətə qayıdışının xalqın tələbi və tarixi zərurət olduğunu vurğulayıb. Qeyd olunub ki, 1992-ci ildə cəmiyyətin ağır böhran və xaos içində olduğu bir dövrdə yaranan YAP qısa müddət ərzində ümumxalq partiyasına çevrilərək Azərbaycanın xilaskarı və inkişafının təminatçısı rolunu oynayıb.
Bu gün YAP təkcə Azərbaycanın deyil, bütövlükdə Cənubi Qafqazın ən böyük siyasi qüvvəsi statusunu qoruyub saxlayır və ölkədə həyata keçirilən bütün mütərəqqi dəyişikliklərin avanqardında dayanır.
YAP-ın VIII Qurultayının əsas leytmotivini ölkəmizin əldə etdiyi tarixi Zəfər və post-konflikt dövrünün reallıqları təşkil edib.
Ərazi bütövlüyünün bərpası: Dövlət başçısı vurğulayıb ki, Azərbaycan xalqı 30 illik işğal faktına son qoyaraq tarixi ədaləti bərpa edib. Suverenliyimizin bütün ölkə ərazisində bərqərar olunması Azərbaycan dövlətçilik tarixində yeni səhifə açdı.
Qarabağ və Şərqi Zəngəzurda Böyük Qayıdış: İşğaldan azad edilmiş ərazilərdə həyata keçirilən irimiqyaslı bərpa-quruculuq işləri, “Böyük Qayıdış” Proqramının uğurlu icrası və keçmiş məcburi köçkünlərin doğma yurdlarına qayıtması dövlət siyasətinin mərkəzində dayanır.
Milli təhlükəsizlik və güclü urdu: Azərbaycan Silahlı Qüvvələrinin modernləşdirilməsi, dünyanın aparıcı hərbi-siyasi standartlarına uyqqunlaşdırılması prosesinin bundan sonra da qətiyyətlə davam etdiriləcəkdir.
Çıxışda ölkənin iqtisadi potensialının gücləndirilməsi, qeyri-neft sektorunun inkişafı, rəqəmsal transformasiya və yaşıl enerji keçidi kimi prioritetlər xüsusi qeyd olunub. Prezident İlham Əliyev bildirib ki, Azərbaycan qlobal miqyasda etibarlı tərəfdaş kimi mövqeyini möhkəmləndirib, Avropanın enerji təhlükəsizliyində mühüm rol oynamaqla yanaşı, yaşıl enerji dəhlizlərinin yaradılmasının fəal təşəbbüskarıdır.
Eyni zamanda, əhalinin sosial rifahının yaxşılaşdırılması, şəhid ailələrinə, qazilərə göstərilən dövlət qayğısı və regionların sosial-iqtisadi inkişafı istiqamətində görülən işlər hakim partiyanın fəaliyyətinin əsas meyarı olaraq qalır.
Müasir dövrdə Azərbaycanın beynəlxalq münasibətlər sistemində müstəqil siyasət yürüdən, söz sahibinə çevrilmiş güclü dövlət olduğunu diqqətə çatdıran YAP Sədri ölkəmizin Qoşulmama Hərəkatındakı uğurlu sədrliyini, ikitərəfli və çoxtərəfli formatlarda qazanılan diplomatik uğurları xatırladıb. Azərbaycan heç bir kənar təsirə boyun əymədən yalnız milli maraqlara əsaslanan xarici siyasət həyata keçirir.
Yeni Azərbaycan Partiyasının VIII Qurultayı partiyanın gələcək fəaliyyət istiqamətlərini müəyyənləşdirməklə yanaşı, Azərbaycanın qüdrətli gələcəyə doğru inamlı addımlarını bir daha nümayiş etdirdi. Prezident İlham Əliyevin rəhbərliyi ilə YAP qarşıya qoyulan bütün böyük hədəflərə nail olmaq üçün cəmiyyətin avanqard qüvvəsi kimi səfərbərliklə fəaliyyətini davam etdirəcəkdir.
Heydər Rəhimov,
Nizami Bələdiyyəsinin sədr müavini
