İnformasiya texnologiyalarının sürətli inkişafı müasir dövlətlərin təhlükəsizlik anlayışını əhəmiyyətli dərəcədə dəyişdirib. İnformasiya məkanında baş verən proseslər artıq yalnız kommunikasiya və media sahəsi ilə məhdudlaşmır, siyasi sabitliyə, milli təhlükəsizliyə və ictimai münasibətlərə birbaşa təsir göstərir. Bu səbəbdən informasiya təhlükəsizliyi müasir dövlətçilik strategiyasının əsas istiqamətlərindən birinə çevrilib.
Azərbaycan Respublikasının Konstitusiyası fikir və söz azadlığını, məlumat əldə etmək hüququnu və şəxsi həyatın toxunulmazlığını təsbit edir. Bu hüquqların təmin olunması informasiya mühitində balanslı və məsuliyyətli yanaşmanı tələb edir. Bir tərəfdən, vətəndaşların informasiya əldə etmək və fikirlərini ifadə etmək hüquqları qorunmalı, digər tərəfdən, dövlətin təhlükəsizliyinə, insanların hüquqlarına və qanuni maraqlarına zərər vuran fəaliyyətlərin qarşısı qanun çərçivəsində alınmalıdır.
Ümummilli Lider Heydər Əliyevin dövlətçilik strategiyasında informasiya siyasətinin və milli maraqların müdafiəsinin mühüm yeri olub. Müstəqil Azərbaycanın beynəlxalq informasiya məkanında mövqelərinin gücləndirilməsi, dövlətin ictimaiyyətlə əlaqələrinin inkişafı və milli maraqların təbliği bu siyasətin əsas istiqamətlərindəndir. İnformasiya mühitinin dövlətin inkişaf strategiyası ilə uzlaşdırılması sonrakı dövrlər üçün də mühüm baza yaradıb.
Prezident İlham Əliyevin rəhbərliyi ilə rəqəmsal infrastrukturun inkişafı, informasiya təhlükəsizliyinin gücləndirilməsi və dövlət xidmətlərinin elektronlaşdırılması istiqamətində mühüm addımlar atılıb. Vətən müharibəsi dövründə informasiya mühitində müşahidə edilən proseslər də bu sahənin milli təhlükəsizlik baxımından əhəmiyyətini aydın şəkildə nümayiş etdirdi. Dezinformasiya ilə mübarizə, dəqiq məlumatların yayılması və informasiya suverenliyinin qorunması dövlət siyasətinin mühüm istiqamətlərindən biri kimi aktuallaşıb.
Müasir informasiya təhlükəsizliyi həm dövlət qurumlarının, həm də vətəndaşların məsuliyyətini nəzərdə tutur. Media savadlılığının artırılması, şəxsi məlumatların qorunması və rəqəmsal resurslardan təhlükəsiz istifadə cəmiyyətin dayanıqlılığını gücləndirir. Konstitusiyanın hüquq və azadlıqlara dair müddəaları informasiya təhlükəsizliyinin hüquqi sərhədlərini müəyyənləşdirən əsas prinsiplərdən biridir.
Vüqar Quliyev,
YAP Nizami rayon təşkilatının “Heydər Əliyev prospekti, 113” ərazi partiya təşkilatının sədr müavini
