Dövlətçilik ənənələrinin qorunması hər bir xalqın tarixi yaddaşının və milli kimliyinin davamlılığını təmin edən mühüm prosesdir. Hüquqi və siyasi institutların inkişafı ilə yanaşı, dövlətçilik dəyərlərinin gələcək nəsillərə ötürülməsi də müstəqil dövlətin strateji vəzifələrindən biridir. Azərbaycan Respublikasının Konstitusiyası milli dövlətçilik prinsiplərini hüquqi səviyyədə təsbit etməklə bu prosesin əsas dayaqlarından birini təşkil edir.
Azərbaycan xalqının dövlətçilik tarixi qədim ənənələrə və mühüm siyasi mərhələlərə malikdir. 1918-ci ildə Azərbaycan Xalq Cümhuriyyətinin yaradılması milli müstəqillik ideyasının reallaşması baxımından tarixi hadisə idi. 1991-ci ildə müstəqilliyin bərpası isə həmin dövlətçilik ideyasının yeni tarixi şəraitdə davam etdirilməsinə imkan yaratdı. Bu tarixi varislik müasir Azərbaycan dövlətinin siyasi və mənəvi əsaslarını formalaşdırır.
Ümummilli Lider Heydər Əliyevin fəaliyyəti dövlətçilik ənənələrinin müasir hüquqi sistemlə əlaqələndirilməsi baxımından xüsusi əhəmiyyət daşıyır. Onun rəhbərliyi ilə 1995-ci ildə qəbul edilən Konstitusiya müstəqil Azərbaycanın hüquqi əsaslarını müəyyənləşdirdi. Heydər Əliyevin milli dilin, mədəniyyətin və dövlətçilik düşüncəsinin qorunmasına yönəlmiş siyasəti də bu tarixi varisliyin mühüm tərkib hissəsidir.
Prezident İlham Əliyevin rəhbərliyi ilə Azərbaycanın ərazi bütövlüyünün və suverenliyinin bərpası dövlətçilik tarixində yeni mərhələ yaradıb. Vətən müharibəsində əldə edilmiş Zəfər gənc nəslin milli qürur və vətənpərvərlik düşüncəsinin güclənməsinə mühüm təsir göstərib. Azad edilmiş ərazilərdə həyata keçirilən bərpa işləri isə tarixi yaddaşın və milli dövlətçilik irsinin qorunması baxımından xüsusi əhəmiyyət daşıyır.
Dövlətçilik ənənələrinin gələcək nəsillərə ötürülməsi üçün hüquqi maarifləndirmə, milli tarixə hörmət və vətəndaş məsuliyyətinin inkişafı vacibdir. Gənclər Konstitusiyanın mahiyyətini və dövlət müstəqilliyinin dəyərini dərindən dərk etməlidirlər. Bu yanaşma Azərbaycanın siyasi sabitliyinin, milli birliyinin və suveren dövlət kimi davamlı inkişafının əsas şərtlərindən biridir.
Nüşabə Məmmədova,
YAP Nizami rayon təşkilatının “Ə.Kürçaylı küçəsi, 17” ərazi partiya təşkilatının sədr müavini
