Azərbaycan Respublikasının Dövlət Bayrağı xalqımızın milli kimliyini, tarixi yaddaşını, dövlətçilik ənənələrini və müstəqillik ideallarını özündə əks etdirən ali dövlətçilik rəmzlərindən biridir. Hər bir müstəqil dövlətin beynəlxalq münasibətlər sistemində özünəməxsus yerini və suverenliyini təcəssüm etdirən dövlət atributları mövcuddur. Azərbaycan Respublikasının üçrəngli Dövlət Bayrağı da milli birliyin, azadlığın və dövlət müstəqilliyinin mühüm ifadəsidir. Azərbaycanın üçrəngli bayrağı ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə qəbul edilmişdir. Bu bayraq türkçülük, müasirlik və islamçılıq ideyalarını təcəssüm etdirən üç rəngdən ibarətdir. Mavi rəng türk mənşəyini və milli kimliyi, qırmızı rəng müasirləşmə və demokratik inkişafı, yaşıl rəng isə islam sivilizasiyasına mənsubiyyəti ifadə edir. 1990-cı il noyabrın 17-də Naxçıvan Muxtar Respublikası Ali Məclisinin qərarı ilə üçrəngli bayraq yenidən dövlət bayrağı kimi qəbul edilmiş, 1991-ci il fevralın 5-də isə Azərbaycan Respublikasının Dövlət Bayrağı statusunu bərpa etmişdir. Dövlət Bayrağı Gününün təsis edilməsi milli dövlətçilik irsinin qorunması və vətəndaşlarda vətənpərvərlik hisslərinin gücləndirilməsi baxımından mühüm əhəmiyyət daşıyır. 2009-cu ildə imzalanmış müvafiq sərəncamla noyabrın 9-u Azərbaycan Respublikasının Dövlət Bayrağı Günü elan edilmişdir. Bu əlamətdar gün dövlətçilik tariximizin, milli-mənəvi dəyərlərimizin və müstəqillik uğrunda mübarizəmizin təbliğinə xidmət edir. Azərbaycan Respublikasının Dövlət Bayrağı ölkənin ərazi bütövlüyünün və suverenliyinin bərpası ilə əlaqədar tarixi hadisələrdə də xüsusi mənəvi-siyasi əhəmiyyət kəsb etmişdir. 2020-ci ildə Vətən müharibəsində əldə edilmiş tarixi Zəfər nəticəsində Azərbaycan bayrağının işğaldan azad edilmiş ərazilərdə dalğalanması dövlət suverenliyinin və milli birliyin təntənəsinin parlaq ifadəsinə çevrilmişdir.
Beləliklə, Azərbaycan Respublikasının Dövlət Bayrağı yalnız dövlət atributu deyil, həm də xalqımızın tarixi irsini, milli həmrəyliyini, müstəqillik əzmini və gələcəyə inamını özündə birləşdirən müqəddəs milli rəmzdir. Dövlət Bayrağına hörmət hər bir vətəndaşın dövlətçilik dəyərlərinə, milli kimliyinə və Vətəninə sədaqətinin mühüm göstəricisidir.
Rəsul Babayev,
YAP Yasamal rayon təşkilatının fəal gənci
